DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

  • PDF

ລັດໃຫ້ລາວອາໂກເທັກ ປູກປາມຜະລິດ ນໍ້າມັນກາຊວນຊີວະພາບ

  • Thursday, 12 April 2012 12:20

ລັດຖະບານ​ອະນຸຍາດ​ ໃຫ້ບໍລິສັດ ​ລາວ​ອາ​ໂກ​ເທັກ ຈຳກັດ ເຂົ້າ​ມາ​ສຳ​ຫລວດ​ເນື້ອທີ່​ປູກປາມ ເພື່ອ​ຜະລິດ​ນ້ຳມັນ​ກາ​ຊວນຊີວະ​ພາບ​ໃຊ້ ຫລັງ​ໄດ້​ມີ​ການ​ລົງນາມ​ກັບ​ ກະຊວງ​ພະລັງງານ ແລະ ບໍ່​ແຮ່, ຜູ້ອຳນວຍການ​ບໍ​ລິສັດ​ລາວ​ອາ​ໂກ​ເທັກ​ເຜີຍ​ປະຈຸ​ບັນ ຈົກ​ທຶນ 1 ລ້ານ​ໂດ​ລາ​ສະ­ຫະ­ລັດປູກ​ປາມ 200 ເຮັກຕາ, ອີກ 5 ປີ​ສ້າງ​ໂຮງງານ​ຂະຫນາດ​ນ້ອຍກັ່ນ ​ນ້ຳ­ມັນ​ປາມ.
ພິທີ​ລົງ​ນາມ​ມີ​ຂຶ້ນ​ໃນ​ຕອນແລງ​ວັນ​ທີ 9 ເມສາ 2012 ທີ່ ໂຮງແຮມ​ດອນ​ຈັນ​ພາ​ເລດ​ລະຫວ່າງ​ທ່ານ ຫັດສະດີ ສີ​ສຸ​ລາດ ຫົວຫນ້າ​ສະ​ຖາ​ບັນ​ສົ່ງເສີມ​ພະລັງ​ງານ​ທົດ​ແທນ ​ກະຊວງ​ພະລັງງານ ແລະ ບໍ່​ແຮ່ ກັບ ທ່ານ ອຸດົມ ແກ້ວ​ທະ​ວົງ ຜູ້ອຳນວຍການ​ບໍ​ລິສັດ​ລາວ​ອາ​ໂກ​ເທັກ ຈຳ­ກັດ ເປັນກຽດ​ເຂົ້າ​ຮ່ວມ​ຂອງ​ທ່ານ ວິ​ຣະພົນ ວິ​ຣະ​ວົງສາ ລັດຖະມົນຕີຊ່ວຍ​ວ່າການ​ກະຊວງ​ພະລັງງານ ແລະ ບໍ່​ແຮ່​ ມີ​ພະນັກງານ ພ້ອມ​ພາກສ່ວນ​ກ່ຽວຂ້ອງ​ເຂົ້າຮ່ວມ.
ທ່ານ ບຸນ​ມາ ຈັນທະ​ວົງສາ ປະທານ​ທີ່​ປຶກສາ​ບໍລິສັດ​ລາວ​ອາ ໂກ​ເທັກ ຈຳກັດ ກ່າວ​ວ່າ: ການລົງ​ນາມ​ຄັ້ງ​ນີ້ ລະຫວ່າງ​ບໍລິສັດກັບກະຊວງ​ພະລັງງານ ແລະ ບໍ່​ແຮ່​ເປັນ​ການ​ຮ່ວມ​ມື​ໂຄງການສາທິດ​ການ​ຜະລິດ ແລະ ການ​ນຳໃຊ້​ນ້ຳມັນ​ກາ​ຊວນ​ຊີວະ​ພາບ​ຈາກນ້ຳມັນ​ປາມ ພ້ອມ​ທັງ​ອະນຸຍາດໃຫ້​ບໍລິສັດ​ເຂົ້າ​ມາ​ສຳ​ຫລວດ​ເນື້ອທີ່​ປູກ​ປາມ​ໃນ​ ທົ່ວ​ປະເທດ​ວ່າ​ມີຄວາມ​ເປັນ​ໄປ​ໄດ້​ພຽງ​ໃດ​ທີ່​ຈະປູກ​ປາມ ເພື່ອ​ຈະ​ເອົາ​ນ້ຳມັນ​ປາມ ມາ​ເຮັດ​ເປັນ​ນ້ຳມັນ​ກາ​ຊວນ​ຊີວະພາບ​ເປັນ​ພະລັງງານ​ທົດ​ແທນ.
ທ່ານ ອຸດົມ ແກ້ວ​ທະ​ວົງ ຜູ້ອຳນວຍ​ການ​ບໍລິສັດ​ລາວ​ອາ​ໂກເທັກ ຈຳກັດ ກ່າວ​ວ່າ: ປະຈຸ​ບັນ ທາງ​ບໍລິສັດ​ລາວ​ອາ​ໂກ​ເທັກ ຈຳກັດ ລົງທຶນ​ໄປ​ແລ້ວ 1 ລ້ານ​ກວ່າໂດ​ລາ​ສະຫະລັດ ເພາະ​ພັນ​ແນວຕົ້ນ​ປາມ ພ້ອມ​ທັງ​ຈັດ​ສັນ​ຫາ​ສະຖານ​ທີ່​ປູກ 200 ເຮັກຕາ​ໃນ​ສອງເມືອງ​ຄື: ເມືອງ​ນາ​ຊາຍ​ທອງ ແລະ ເມືອງ​ປາກ​ງື່ມ ນອກຈາກ​ນີ້ ທາງ​ບໍລິສັດ​ຍັງ​ຈະ​ຫາ​ເນື້ອທີ່​ດິນ ເພື່ອ​ສຳ​ປະທານ​ໃນຕໍ່ຫນ້າ​ໃຫ້ໄດ້ 500Œ-1000 ເຮັກຕາຈິ່ງສາມາດ​ຕອບ​ສະຫນອງ​ຕາມຄວາມ​ຮຽກຮ້ອງ​ຕ້ອງການ​ຂອງຕະຫລາດ​ ນ້ຳມັນ​ປາມ ໂດຍ​ສະເພາະ​ຕະຫລາດ​ໂລກ​ປະຈຸ​ບັນຄວາມ​ຕ້ອງການ​ ນ້ຳມັນ​ປາມ​ສູງ ເຖິງ 68,1% ຂະນະ​ທີ່​ຕະຫລາດ ສປ ຈີນ, ອິນ​ເດຍ​ມີ​ຄວາມ​ຕ້ອງການ​ສູງ​ເຖິງ 100 ລ້ານ​ໂຕນ​ໃນ ປີ 2015.
ແນວໃດ​ກໍ່​ຕາມ ທາງ​ບໍລິສັດມີ​ແຜນ​ໃນ​ອີກ 5 ປີ​ຂ້າງ​ຫນ້າກຽມ​ລົງທຶນ​ປະມານ 5 ລ້ານ​ໂດ ລາ​ສະຫະລັດ ເພື່ອ​ສ້າງຕັ້ງ​ໂຮງງານ​ຂະຫນາດ​ນ້ອຍ ເພື່ອ​ກັ່ນ​ນ້ຳມັນ​ປາມ​ທີ່​ຈະ​ຕັ້ງ​ຢູ່​ເມືອງ​ເຟືອງ ແຂວງ​ວຽງ​ຈັນ ເພາະ​ຕົ້ນ​ປາມ ຫລັງ​ຈາກ​ລົງມື​ປູກ 30 ເດືອນ ແມ່ນ​ສາມາດ​ເກັບ​ກ່ຽວ​ໄດ້ ສ່ວນຕະຫລາດ​ຮອງ​ຮັບ​ທ່ານ​ປະທານທີ່​ປຶກສາ​ບໍລິສັດ​ບອກ​ບໍ່​ເປັນ​ຫ່ວງ ເພາະ​ປາມ​ສາມາດ​ເຮັດ​ເປັນ​ອາຫານ (FOOD) ອາຫານ​ສັດ (FEED) ເສັ້ນ​ໃຍ (FIBER) ຝຸ່ນ​ຊີວະ​ພາບ (FERTILIZER) ນ້ຳມັນ​ເຊື້ອ​ໄຟ (FUEL) ນອກຈາກ​ນີ້ ຕົ້ນ​ປາມ​ຍັງ​ສາມາດ​ເຮັດເປັນ​ນ້ຳມັນ​ເຊື້ອ​ໄຟ​ຊີວະ​ພາບ (Biomass) ພະລັງງານ​ທົດແທນ​ໄດ້.
ແນວໃດ​ກໍ່​ດີ ການ​ທີ່​ບໍລິສັດ ລາວ​ອາ​ໂກ​ເທັກ ຈຳກັດ ໄດ້​ຮັບອະນຸຍາດ​ຈາກ​ລັດຖະບານ​ລາວ ເຂົ້າ​ມາ​ສຳ​ຫລວດ​ເນື້ອທີ່​ປູກປາມ​ກໍ່​ເປັນ​ອີກ​ຢ່າງ​ທີ່​ສ້າງຄວາມ​ຫມັ້ນ​ ໃຈ​ໃຫ້​ແກ່​ບໍລິສັດ​ທີ່ມາ​ລົງທຶນ​ປູກ​ປາມ ເພາະ​ລອງມາ​ປະຊາສຳພັນ​ກັບ​ພໍ່​ແມ່​ພີ່ນ້ອງປະຊາຊົນ​ຫັນ​ມາ​ປູກ​ປາມ​ ສ້າງລາຍ​ຮັບ​ໃຫ້​ແກ່​ຄອບຄົວ​ ເຫັນ​ວ່າໄດ້ຜົນ​ຕອບ​ຮັບ​ດີ​ເກີນ​ຄາດ.

ທີ່ມາຂອງຂ່າວນີ້: