DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

ເອກກະສານທີ່ມາໃໝ່

  • PDF

ໂຄງການປູກພືດປອດສານພິດ ເລີ່ມເປັນທີ່ສົນໃຈຂອງນັກທຸລະກິດ

  • Tuesday, 12 June 2012 05:20

ວັນ​ທີ 7 ມິ­ຖຸ­ນາ 2012 ທ່ານ ວິ­ໄລ​ວັນ ພົມ​ເຂ ລັດ­ຖະ­ມົນ­ຕີ​ວ່າ­ການ ກະ­ຊວງ​ກະ­ສິ­ກຳ-ປ່າ­ໄມ້ ພ້ອມ​ດ້ວຍ​ ທ່ານ ​ຫົວ­ໜ້າ​ກົມ​ປູກ­ຝັງ, ຫົວ­ໜ້າ​ຫ້ອງ­ການ, ຫົວ­ໜ້າ​ກອງ​ສົ່ງ­ເສີມ, ຫົວ­ໜ້າ​ພະ​ແນກ​ກະ­ສິ­ກຳ-ປ່າ­ໄມ້​ນະ­ຄອນ­ຫຼວງ​ວຽງ​ຈັນ ແລະ ວິ­ຊາ​ການ ຂະ­ແໜງ­ການ​ກ່ຽວ­ຂ້ອງ

ໄດ້​ລົງ​ຊຸກ­ຍູ້​ຕິດ­ຕາມ​ໂຄງ­ການ​ປູກ​ພືດ​ຜັກ​ປອດ​ສານ­ພິດ​ຢູ່​ບ້ານ​ດົງ​ບັງ ແລະ ບ້ານ​ປາກ​ຊາບ​ເກົ່າ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ຂອງ​ບໍ­ລິ­ສັດ ພີ​ເອັສ ສົ່ງ­ເສີມ​ກະ­ສິ­ກຳ ແລະ ອຸດ­ສາ­ຫະ­ກຳ​ຄົບ​ວົງ​ຈອນ ຂາ​ເຂົ້າ-ຂາ​ອອກ ທີ່​ໄປ​ສົ່ງ­ເສີມ​ປູກ.

 

ໂຄງ­ການ​ປູກ​ພືດ​ປອດ​ສານ­ພິດ​ຢູ່​ສອງ​ຈຸດ​ດັ່ງ­ກ່າວ ເປັນ​ໂຄງ­ການ​ລິ​ເລີ່ມ​ໃໝ່​ຂອງ​ບໍ­ລິ­ສັດ ທີ່​ໄດ້​ລົງ​ໄປ​ຊຸກ­ຍູ້​ສົ່ງ­ເສີມ​ປະ­ຊາ­ຊົນ​ເຂດ​ດັ່ງ­ກ່າວ ຫັນ​ມາ​ປູກ​ພືດ​ປອດ​ສານ­ພິດ ດ້ວຍ​ການ​ນຳ​ໃຊ້​ເຕັກ­ນິກ​ວິ­ທະ­ຍາ­ສາດ​ເຂົ້າ​ຊ່ວຍ ເພື່ອ​ສ້າງ​ໃຫ້​ເຂົາ­ເຈົ້າ​ມີ​ວຽກ​ເຮັດ​ງານ​ທຳ​ມີ​ລາຍ​ຮັບ ຍົກ​ສູງ​ຊີ­ວິດ​ການ​ເປັນ​ຢູ່​ໃຫ້​ດີ​ຂຶ້ນ ສາ­ມາດ​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ ໄດ້​ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ​ເຮົາ​ວາງ​ອອກ.

ສຳ­ລັບ​ຮູບ​ແບບ​ການ​ສົ່ງ­ເສີມ​ຂອງ​ບໍ­ລິ­ສັດ ແມ່ນ​ທາງ​ບໍ­ລິ­ສັດ​ຈະ​ເປັນ​ຜູ້​ໄປ​ລົງ­ທຶນ ແລະ ປະ­ຊາ­ຊົນ​ເປັນ​ແຮງ​ງານ​ຕົ້ນ­ຕໍ ເຂົ້າ​ໃນ​ການ​ຜະ­ລິດ ສ່ວນ​ວິ­ຊາ​ການ​ທັງ​ສອງ​ຝ່າຍ​ສົມ­ທົບ​ກັນ ຜ່ານ​ການ​ລົງ​ຕິດ­ຕາມ​ການ​ປູກ​ເຫັນ​ວ່າ ໂຄງ­ການ​ເລີ່ມ​ເປັນ​ຮູບ​ເປັນ​ຮ່າງ ຄື​ຢູ່​ບ້ານ​ດົງ​ບັງ ມີ​ປະ­ຊາ­ຊົນ​ຈຳ­ນວນ 5 ຄອບ­ຄົວ ແລະ ບ້ານ​ປາກ​ຊາບ​ເກົ່າ​ມີ 25 ຄອບ­ຄົວ ທີ່​ໄດ້​ເຂົ້າ​ມາ​ເປັນ​ສະ­ມາ­ຊິກ​ໂຄງ­ການ ເນື້ອ­ທີ່​ໂຄງ­ການ​ສອງ​ຈຸດ​ມີ 5,5 ເຮັກ­ຕາ ໃນ​ນັ້ນ ບ້ານ​ດົງ​ບັງ​ມີ 5 ໄລ່ ແລະ ບ້ານ​ປາກ​ຊາບ​ເກົ່າ​ມີ 5 ເຮັກ­ຕາ ປັດ­ຈຸ­ບັນ​ແມ່ນ​ກຳ­ລັງ​ປູກ​ຜັກ­ກາດ­ຊອມ, ສະ­ຫຼັດ, ຫອມ­ປ້ອມ ແລະ ຜັກ­ຫອມ​ຊີ. ເຕັກ­ນິກ​ການ​ປູກ ແມ່ນ​ທາງ​ບໍ­ລິ­ສັດ​ໄດ້​ໃຊ້​ຜ້າ​ຢາງ​ຂາວ​ເຮັດ​ເຮືອນ​ມຸ່ງ ເພື່ອ​ເຮັດ​ປະ­ກັນ​ການ​ປູກ​ໃນ​ລະ­ດູ­ຝົນ​ບໍ່​ໃຫ້​ພືດ​ຜັກ​ເໜົ່າ​ເປື່ອຍ ນອກ­ຈາກ​ປູກ​ພືດ​ຜັກ​ແລ້ວ ທາງ​ບໍ­ລິ­ສັດ​ຍັງ​ສົ່ງ­ເສີມ​ລ້ຽງ­ສັດ​ຕື່ມ​ອີກ.

ນອກ­ຈາກ​ສອງ​ຈຸດ​ດັ່ງ­ກ່າວ​ນີ້​ແລ້ວ ທາງ​ບໍ­ລິ­ສັດ​ຍັງ​ໄດ້​ໄປ​ສົ່ງ­ເສີມ​ຢູ່​ເມືອງ​ຮົ່ມ ແຂວງ​ວຽງ​ຈັນ ເມືອງ​ສັງ​ທອງ ແລະ ເມືອງ​ປາກ​ງື່ມ​ຕື່ມ​ອີກ ເປົ້າ​ໝາຍ​ການ​ສົ່ງ­ເສີມ​ແມ່ນ​ເລັ່ງ​ໃສ່​ບັນ­ດາ​ເມືອງ​ທຸກ​ຍາກ ເພື່ອ​ຫັນ­ປ່ຽນ​ອາ­ຊີບ​ຂອງ​ປະ­ຊາ­ຊົນ​ຈາກ​ການ​ຖາງ​ປ່າ​ເຮັດ​ໄຮ່​ແບບ​ ເລື່ອນ­ລອຍ ມາ​ເຮັດ​ການ​ຜະ­ລິດ​ແບບ​ຄົງ​ທີ່.

ທ່ານ​ຜູ້­ອຳ­ນວຍ­ການ​ບໍ­ລິ­ສັດ​ກ່າວ​ວ່າ: ໂຄງ­ການ​ປູກ​ພືດ​ຜັກ​ປອດ​ສານ­ພິດ ໂດຍ​ແມ່ນ​ບໍ­ລິ­ສັດ​ເປັນ​ລົງ­ທຶນ ດ້ວຍ​ທຶນ​ຕົນ​ເອງ ແລະ ກູ້​ຢືມ​ນຳ​ທະ­ນາ­ຄານ​ຈຳ­ນວນ​ໜຶ່ງ​ ໃນ​ຜ່ານ​ມາ​ຜ່ານ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ເຫັນ​ວ່າ​ທຶນ­ຮອນ​ບໍ່​ພຽງ­ພໍ​ກັບ​ການ​ຂະ­ຫຍາຍ​ໂຄງ­ການ ດັ່ງ­ນັ້ນ ຈຶ່ງ​ສະ­ເໜີ​ມາ​ຍັງ​ພາກ​ລັດ ໂດຍ​ສະ­ເພາະ​ທາງ​ທະ­ນາ­ຄານ​ນະ­ໂຍ­ບາຍ ໃຫ້­ການ​ຊຸກ­ຍູ້​ສົ່ງ­ເສີມ​ໃນ​ການ​ສະ­ໜອງ​ໃຫ້​ກູ້ ເພື່ອ​ຈະ​ໄດ້​ມີ​ທຶນ­ຮອນ​ພັດ­ທະ­ນາ​ໂຄງ­ການ​ໃຫ້​ຂະ­ຫຍາຍ­ຕົວ ແລະ ຍືນ​ຍົງ​ຕະ­ຫຼອດ​ໄປ ເພາະ​ໂຄງ­ການ​ດັ່ງ­ກ່າວ ປະ­ຊາ­ຊົນ​ມີ​ສ່ວນ​ຮ່ວມ ຖ້າ​ໂຄງ­ການ​ດຳ­ເນີນ​ໄປ​ໄດ້​ດີ ກໍ​ຈະ​ເຮັດ​ໃຫ້​ປະ­ຊາ­ຊົນ​ມີ​ວຽກ​ເຮັດ​ງານ​ທຳ ແລະ ມີ​ລາຍ​ຮັບ​ຕະ­ຫຼອດ​ໄປ.

ຜ່ານ​ການ​ລົງ​ຕິດ­ຕາມ ທ່ານ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ-ປ່າ­ໄມ້ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຄວາມ​ຕັດ­ສິນ​ໃຈ​ສູງ​ຂອງ​ບໍ­ລິ­ສັດ ທີ່​ເຫັນ​ໄດ້​ຄວາມ​ສຳ­ຄັນ​ຕໍ່​ສຸ­ຂະ­ພາບ ຈຶ່ງ​ໄດ້​ຫັນ​ມາ​ລົງ­ທຶນ​ປູກ​ພືດ​ປອດ​ສານ­ພິດ​ເປັນ​ສິນ­ຄ້າ ເພື່ອ​ການ​ບໍ­ລິ­ໂພກ ໂຄງ­ການ​ນີ້ ແມ່ນ​ຖືກ​ຕາມ​ແຜນ​ພັດ­ທະ­ນາ​ເສດ­ຖະ­ກິດ​ແຫ່ງ​ຊາດ ພ້ອມ​ທັງ​ຊ່ວຍ​ພັກ-ລັດ​ໃນ​ການ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ.

 

ແຫຼ່ງທີ່ມາຂອງຂ່າວ: