DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

  • PDF

ຮອດ 2020 ເຊກອງຈະມີ ຊົນລະປະທານເພີ່ມອີກ 13 ແຫ່ງ

  • Friday, 05 April 2013 04:29

ແຂວງເຊ​ກອງ ​ເປັນ​ແຂວງ​ນ້ອຍ​ສຸດ​ທີ່​ນອນ​ໃນ 4 ແຂວງ​ພາກ​ໃຕ້​ ຂອງ ສປປ ລາວ, ທົ່ວ​ແຂວງ​ມີ​ເນື້ອ­ທີ່​ ທັງ​ຫມົດ 7.665 ຕາ­ຕະ­ລາງ​ກິ​ໂລແມັດ, ໃນ​ນັ້ນ​ ເນື້ອ­ທີ່​ເຂດ​ພູ​ດອຍ​ກວມ​ເອົາ 65% ເຂດ​ພູ​ພຽງ​ກວມ 30% ເຂດ​ທົ່ງ­ພຽງ​ກວມ 5% ມີ​ແມ່­ນ້ຳ​ໄຫລ​ຜ່ານ ຫລາຍ​ສາຍ​ເຊັ່ນ: ນ້ຳ​ເຊ​ກອງ, ເຊໂດນ, ເຊ​ຂະ­ຫນານ, ເຊ​ນ້ຳ​ນ້ອຍ, ຫ້ວຍ​ລຳ​ພັນ ແລະ ຫ້ວຍ​ອື່ນໆ ເຊິ່ງ​ມີ​ເງື່ອນ­ໄຂ​ໃນ​ການ​ ສ້າງ​ເຂື່ອນ​ໄຟຟ້າ​ນ້ຳ­ຕົກ​ຂະ­ຫນາດ​ນ້ອຍ, ຂະ­ຫນາດ​ກາງ ແລະ ຂະ­ຫນາດ​ໃຫຍ່.

ທ່ານ ທອງ­ຄຳ ມະ­ນີ​ວົງ ຫົວຫນ້າ​ ພະ​ແນກ​ກະ­ສິ­ກຳ-ປ່າ­ໄມ້ ແຂວງ​ເຊ​ກອງ​ລາຍ​ງານ​ໃຫ້​ຮູ້​ວ່າ:

ແຂວງ​ເຊ​ກອງ ​ມີ​ບັນ­ຊີ​ໂຄງ­ການ​ຊົນ­ລະ­ປະ­ທານ ​ທີ່​ໄດ້​ເອ­ກະ​ພາບ​ສັງລວມ ​ເຂົ້າ​ເປັນ​ແຜນ​ຍຸດ​ທະ​ສາດ​ໃນ​ການ​ພັດ­ທະ­ນາ​ ພາຍ​ໃນ​ແຂວງ​ເຊ​ກອງ ​ເພື່ອ​ຮັບ​ໃຊ້​ໃນ​ໄລ­ຍະ​ສັ້ນ, ໄລ­ຍະ​ຍາວ​ແຕ່​ປີ 2013 ຫາ 2020 ແລະ ຈັດ​ລຽງ​ບຸ­ລິ­ມະ­ສິດ ຂອງ​ແຕ່​ລະ​ໂຄງ­ການ​ຄື: ໂຄງ­ການ​ທີ່​ໄດ້​ສຶກ​ສາ ແລະ ສຳ​ຫລວດ-ອອກ​ແບບ​ສຳ­ເລັດ​ແລ້ວ ແລະ ສະ­ເຫນີ​ກໍ່­ສ້າງ​ໃນ​ປີ 2014 ມີ 3 ໂຄງ­ການ, ລວມ​ມູນ​ຄ່າ​ການ​ກໍ່­ສ້າງ​ທັງ​ຫມົດ 104,96 ຕື້​ກີບ; ໃນ​ນັ້ນ: ໂຄງ­ການ​ຄູ​ກັນ​ນ້ຳ​ຫ້ວຍ​ເພົາ​ເມືອງ​ທ່າ​ແຕງ, ລວມ​ມູນ​ຄ່າ ການ​ກໍ່­ສ້າງ 29,160 ຕື້​ກີບ; ໂຄງ­ການ​ຝາຍ​ນ້ຳ​ລົ້ນ​ຫ້ວຍ​ນວນ​ເມືອງ​ລະ​ມາມ, ລວມ​ມູນ​ຄ່າ 15,6 ຕື້ ກີບ, ໂຄງ­ການ​ຝາຍ​ນ້ຳ​ລົ້ນ​ຫ້ວຍ​ວີ (ທົ່ງ​ນາ​ບ້ານ​ປາກ​ໂທນ) ເມືອງ ລະ​ມາມ, ລວມ​ມູນ​ຄ່າ 60,2 ຕື້ ກີບ, ໂຄງ­ການ​ທີ່​ຈະ​ຕ້ອງ​ໄດ້​ສຶກສາ ແລະ ສຳ​ຫລວດ-ອອກ​ແບບ​ມີ 10 ໂຄງ­ການ, ລວມ​ມູນ​ຄ່າ​ການ​ກໍ່­ສ້າງ​ທັງ​ຫມົດ 741,76 ຕື້​ກີບ​ຄື: ໂຄງ­ການ​ອ່າງ­ເກັບ­ນ້ຳ​ຫ້ວຍ​ກະ­ຢ່ອງ​ເມືອງ​ລະ​ມາມ, ລວມ​ມູນ​ຄ່າ 23,8 ຕື້​ກີບ, ໂຄງ­ການ​ເອົາ​ນ້ຳ ທ້າຍ​ເຂືອນ​ຫ້ວຍ​ລຳ​ພັນ 2, ເມືອງ ລະ​ມາມ, ລວມ​ມູນ​ຄ່າ 36,2 ຕື້ ກີບ, ໂຄງ­ການ​ອ່າງ­ເກັບ­ນ້ຳ​ຫ້ວຍ ຢືດ ເມືອງ​ລະ​ມາມ (ເອົາ​ນ້ຳ​ເຂົ້າ ຊ່ວຍ​ຫ້ວຍ​ລຳ​ພັນ 2) ລວມ​ມູນ​ຄ່າ 53,36 ຕື້​ກີບ, ໂຄງ­ການ​ອ່າງ­ເກັບ­ນ້ຳ​ຫ້ວຍ​ປື ເມືອງ​ລະ​ມາມ, ລວມ​ມູນ​ຄ່າ 343,1 ຕື້​ກີບ, ໂຄງ­ການ ອ່າງ­ເກັບ­ນ້ຳ​ຫ້ວຍ​ວີ (ບ້ານ​ຕິ້ວ) ເມືອງ​ລະ​ມາມ, ລວມ​ມູນ​ຄ່າ 58,7 ຕື້​ກີບ, ໂຄງ­ການ​ອ່າງ​ເກັບ ນ້ຳ​ຫ້ວຍ​ວີ1, ເມືອງ​ລະ​ມາມ (ເອົາ​ນ້ຳ​ຊ່ວຍ​ຫ້ວຍ​ວີ​ປາກ​ໂທນ), ລວມ​ມູນ​ຄ່າ 25 ຕື້​ກີບ, ໂຄງ­ການ ອ່າງ­ເກັບ­ນ້ຳ​ຫ້ວຍ​ວີ 2, ເມືອງ​ລະມາມ (ເອົາ​ນ້ຳ​ຊ່ວຍ​ຫ້ວຍ​ວີ​ປາກ ໂທນ), ລວມ​ມູນ​ຄ່າ 25 ຕື້​ກີບ, ໂຄງ­ການ​ອ່າງ­ເກັບ­ນ້ຳ​ຫ້ວຍ​ຊາຍ​ເມືອງ​ທ່າ​ແຕງ, ລວມ​ມູນ​ຄ່າ 48,6 ຕື້​ກີບ, ໂຄງ­ການ​ຝາຍ​ນ້ຳ​ລົ້ນ​ຫ້ວຍ​ລີ​ເຈືອງ​ເມືອງ​ທ່າ​ແຕງ, ລວມ​ມູນ​ຄ່າ 81,6 ຕື້​ກີບ, ໂຄງ­ການ​ຝາຍ​ນ້ຳ​ລົ້ນ​ຫ້ວຍ​ລາ​ມ່ວງ​ເມືອງ​ທ່າ​ແຕງ (ເອົາ​ນ້ຳ​ຊ່ວຍ ຫ້ວຍ​ເພົາ), ລວມ​ມູນ​ຄ່າ 46,4 ຕື້​ກີບ.

ທ່ານ​ຫົວ­ຫນ້າ​ພະ​ແນກ​ກະ​ສິ ກຳ-ປ່າ­ໄມ້​ແຂວງ​ເຊ​ກອງ​ຍັງ​ລາຍ​ງານ​ຕື່ມ​ວ່າ: ເພື່ອ​ສູ້​ຊົນ​ປະ­ກອບ­ສ່ວນ​ໃຫ້​ຕົວ​ເລກ​ຄາດ­ຫມາຍ​ການ​ຜະ­ລິດ​ເຂົ້າ­ຂອງ​ ລັດ­ຖະ­ບານ​ບັນ­ລຸ​ເປົ້າ, ສູ້​ຊົນ​ປະ­ຕິ­ບັດ​ຕົວ​ເລກ​ແບ່ງ​ເປັນ​ຂອງ​ກະ­ຊວງ​ກະ­ສິ­ກຳ-ປ່າ­ໄມ້ ແລະ ຈັດ​ຕັ້ງ​ປະ­ຕິ­ບັດ​ຕົວ​ເລກ​ການ​ຜະ­ລິດ​ໃຫ້​ໄດ້​ຕາມ​ແຜນ​ຍຸດ​ທະ ສາດ​ຂອງ​ພະ​ແນກ​ກະ­ສິ­ກຳ-ປ່າ­ໄມ້​ແຂວງ​ວາງ​ໄວ້​ບັນ­ລຸ​ຕາມ​ຄາດ­ຫມາຍ​ຈຳ­ເປັນ ​ຕ້ອງ​ໄດ້​ພັດ­ທະ­ນາ​ດ້ານ​ວຽກ​ງານ​ຊົນ­ລະ­ປະ­ທານ ເພື່ອ​ຂະ­ຫຍາຍ​ເນື້ອ­ທີ່​ຮັບ​ນ້ຳ ແລະ ຮັກ­ສາ​ເນື້ອ­ທີ່ໆ​ມີ​ແລ້ວ​ໃຫ້​ເກີດ​ປະ ໂຫຍດ​ສູງ​ສຸດ ແລະ ຮັບ­ປະ­ກັນ​ຕໍ່​ກັບ​ສະ­ພາບ​ແວດ​ລ້ອມ, ຊັບ­ພະ­ຍາ­ກອນ​ອາ­ກາດ ແລະ ແຫລ່ງ​ນ້ຳ​ທີ່​ມີ​ການ​ປ່ຽນ­ແປງ (ນ້ຳ​ບົກ​ແຫ້ງ ຫລຸດ​ຫນ້ອຍ​ຖອຍ​ລົງ​ຂອງ​ແຕ່​ລະ ປີ) ທັງ​ເປັນ​ການ​ຮັບ­ປະ­ກັນ​ເຂດ​ຈັດ​ສັນ​ຍົກ­ຍ້າຍ, ທີ່​ຕັ້ງ​ພູມ­ລຳ­ເນົາ​ຈັດ​ສັນ​ອາ­ຊີບ​ຄົງ​ທີ່, ແກ້​ໄຂ​ຄວາມ­ທຸກ​ຍາກ ເພື່ອ​ຮັບ­ປະ­ກັນ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ບັນ­ດາ­ເຜົ່າ ນັບ​ມື້​ດີ​ຂຶ້ນ.

 

ທີ່ມາຂອງຂ່າວ: