DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

  • PDF

ໂອກາດສິນຄ້າ ກະສິກຳລາວ ໃນຕະຫລາດຈີນ

  • Friday, 05 April 2013 05:03

ການ​ຮ່ວມ​ມື​ສອງ​ຝ່າຍ​ລາວ ແລະ ຈີນ ​ລວມ​ທັງ​ໃນ​ຂອບ​ອາຊຽນ ແລະ ສິດ­ທິ​ພິ­ເສດ ​ຄື ໂອ­ກາດ​ຂອງ​ລາວ ​ທີ່​ຈະ​ສົ່ງ​ສິນ­ຄ້າ​ໄປ​ຍັງ ສປ ຈີນ, ໃນ​ນີ້ ກວມ​ເອົາ​ສິນ­ຄ້າ​ກະ­ສິ­ກຳ ​ຜ່ານ​ມາ​ລາວ​ກໍ່​ສົ່ງ​ສິນ­ຄ້າ​ກະ­ສິ­ກຳ​ໄປ​ຫລາຍ​ປະ­ເພດ ເຊິ່ງ​ຕະ­ຫລາດ​ຈີນ​ກໍ່​ໃຫ້­ການ​ຕອບ​ຮັບ​ເປັນ ຢ່າງ​ດີ.

ເມື່ອ​ບໍ່​ດົນ​ມາ​ນີ້ ບັນ­ດາ​ແຂວງ​ພາກ​ເຫນືອ​ຂອງ​ລາວ ​ກໍ່​ໄດ້​ສົນ­ທະ­ນາ​ກ່ຽວ​ກັບ​ ການ​ຜະ­ລິດ ແລະ ມາດ​ຕະ­ການ ​ສົ່ງ​ສິນ­ຄ້າ 9 ແຂວງ​ພາກ​ເຫນືອ​ອອກ​ໄປ​ຕະ­ຫລາດ​ຈີນ, ຂະ­ນະ​ດຽວ​ກັນ​ທ່ານ ຄຳ​ຫລ້າ ລິ້ງນະສອນ ເຈົ້າ­ແຂວງໆ ​ອຸ­ດົມ​ໄຊ ​ລາຍງານ​ວ່າ: ແຂວງ​ສົ່ງ​ອອກ​ສິນ­ຄ້າ 1.556 ຕື້​ກີບ, ສ່ວນ​ຫລາຍແມ່ນ​ສົ່ງ​ອອກ​ສິນ­ຄ້າ​ກະ­ສິ­ກຳ, ໃນ​ນີ້ ໄດ້​ສົ່ງ​ໄປ ສປ ຈີນ ສະ­ເພາະ​ສິນ­ຄ້າ ກະ­ສິ­ກຳ​ຈຳ­ນວນ 130 ພັນ​ໂຕນ, ມູນ​ຄ່າ 469,4 ຕື້​ກີບ​ເຊັ່ນ:

ສາ­ລີ 127 ພັນ​ກວ່າ​ໂຕນ, ກ້ວຍ​ຫອມ 1.240 ໂຕນ, ຊາ​ປູກ 200 ໂຕນ, ຫມາກ​ຫນອດ 130 ໂຕນ, ຫມາກ ເດືອຍ 150 ໂຕນ, ເຂົ້າ­ຈ້າວ, ເຂົ້າ­ຫນຽວ 165 ໂຕນ,ຫມາກ­ໂມ 1 ພັນ​ໂຕນ, ຖົ່ວ​ເບີ 1 ພັນ​ໂຕນ, ຫມາກ­ເຜັດ​ໃຫຍ່ 15 ໂຕນ, ຢາ­ສູບ ແລະ ອື່ນໆ ນອກ­ຈາກ​ນີ້​ ແມ່ນ​ສົ່ງ​ອອກ​ຜະ­ລິດ​ຕະ​ພັນ​ໄມ້ 130 ຕື້ ກວ່າ​ກີບ, ເຄື່ອງ​ປ່າ​ຂອງ​ດົງ 128 ລ້ານ​ກວ່າ​ກີບ.

 

ແນວ­ໃດ​ກໍ່​ຕາມ​ຂະ​ບວນ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ​ກໍ່​ຍັງ​ ຂະ­ຫຍາຍ­ຕົວ ເຊິ່ງ​ເນື້ອ­ທີ່​ການ​ຜະ­ລິດ​ກວມ​ເອົາ 76.413 ເຮັກ­ຕາ, ໃນ​ນີ້ ເດັ່ນ​ກວ່າ​ຫມູ່ ແມ່ນ​ສາ­ລີ, ຢາງ­ພາ­ລາ, ກ້ວຍ​ຫອມ, ພືດ​ຕະກຸນ​ຖົ່ວ ແລະ ພືດ​ຜັກ​ຈຳ­ນວນ​ຫນຶ່ງ, ສ່ວນ​ການ​ປູກ​ພືດ ​ເພື່ອ​ຮັບ­ປະ­ກັນ​ການ​ບໍ­ລິ­ໂພກ ​ເປັນ­ຕົ້ນ​ການ​ປູກ​ເຂົ້າ​ ມີ​ເນື້ອ­ທີ່​ເຖິງ 24.675 ເຮັກ­ຕາ, ປູກ​ພືດ​ສະ­ບຽງ​ອາ­ຫານ 6.570 ເຮັກ­ຕາ, ການ​ຜະ­ລິດ​ຊີ້ນ, ປາ​ສະ­ເລ່ຍ​ເກືອບ 7 ພັນ​ໂຕນ​ຕໍ່​ປີ.

ນີ້​ເປັນ​ພື້ນ­ຖານ ​ສຳ­ລັບ​ການ​ຜະລິດ​ກະ­ສິ­ກຳ​ບໍ­ລິ­ໂພກ ແລະ ເປັນ ສິນ­ຄ້າ​ສົ່ງ​ອອກ​ຂອງ​ແຂວງ ເພື່ອ ຕະ­ຫລາດ​ໃຫຍ່ ໂດຍ​ສະ­ເພາະ ສປ ຈີນ.. ສ່ວນ​ແຂວງ​ອື່ນໆ ​ກໍ່​ເຫັນ​ວ່າ ມີ​ຄວາມ​ພະ­ຍາ­ຍາມ​ສູງ​ໃນ​ການ​ຜະ­ລິດ​ກະ­ສິ­ກຳ ​ເປັນ​ສິນ­ຄ້າ ແລະ ການ​ສຳ​ມະ​ນາ​ກ່ຽວ​ກັບ​ການ​ຜະລິດ ແລະ ມາດ​ຕະ­ການ​ສົ່ງ​ສິນ­ຄ້າ​ກະ­ສິ­ກຳ 9 ແຂວງ​ພາກ​ເຫນືອ ອອກ​ສູ່​ຕະ­ຫລາດ ສປ ຈີນ ທີ່​ຈັດ ຂຶ້ນ​ຢູ່​ແຂວງ​ອຸ­ດົມ​ໄຊ ເມື່ອ​ກາງ ເດືອນ​ກຸມ­ພາ​ຜ່ານ​ມາ​ນີ້ ຈະ​ເປັນ​ການ​ເປີດ​ຊ່ອງ​ທາງ​ໃຫ້​ວິ­ຊາ​ການ​ ຈາກ​ແຂວງ​ຕ່າງໆ​ນຳ­ໄປ​ພິ​ຈາ­ລະນາ​ທາງ​ອອກ​ ໃນ​ການ​ຊຸກ­ຍູ້​ສົ່ງ­ເສີມ​ຢູ່​ພາກ​ປະ­ຕິ­ບັດ​ຕົວ​ຈິງ ​ອັນ​ຈະ​ນຳ​ ມາ​ຜົນ​ປະ­ໂຫຍດ​ມາ­ສູ່​ຊາວ​ກະສິ​ກອນ ໂດຍ​ສະ­ເພາະ​ຊ່ອງ​ທາງ​ການ ​ເຂົ້າ​ຫາ​ຕະ­ຫລາດ, ການ​ຜະ­ລິດ​ສິນ­ຄ້າ​ທີ່​ຕະ­ຫລາດ​ຕ້ອງ­ການ ແລະ ບັນ­ຫາ​ອື່ນໆ.


ທີ່ມາຂອງຂ່າວ: