DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

  • PDF

ຄະນະກໍາມະບານຮາກຖານ ກົມປູກຝັງ ຊຸດໃໝ່ ໄດ້ຮັບການຄັດເລືອກ

  • Saturday, 13 February 2016 03:39

ໃນທ້າຍອາທິດທີ່ຜ່ານມາ, ກົມປູກຝັງ ກະຊວງກະສິກໍາ ແລະປ່າໄມ້ ໄດ້ຈັດກອງປະຊຸມໃຫຍ່ຄັ້ງທີ I ຂອງກໍາມະບານຮາກຖານ ກົມປູກຝັງ ທີ່ຫ້ອງປະຊຸມສູນປ້ອງກັນພືດ(ສາລະຄໍາ). ໃຫ້ກຽດເປັນປະທານໂດຍ ສະຫາຍ ຄໍາພັນ ເໝືອນສິດທິດາ ຄະນະພັກກະຊວງ, ຄະນະບໍລິຫານງານສູນກາງສະຫະພັນກໍາມະບານລາວ, ປະທານສະຫະພັນກໍາມະບານກະຊວງກະສິກຳ ແລະປ່າໄມ້, ສະຫາຍ ຄໍາຕັນ ທາດາວົງ ຮອງເລຂາຄະນະພັກຮາກຖານກົມປູກຝັງ, ມີບັນດາຄະນະ ແລະສະມາຊິກສະຫະພັນກໍາມະບານພາຍໃນກົມ, ສູນ ແລະແຂກຖືກເຊີນເຂົ້າຮ່ວມລວມທັງໝົດ 127 ສະຫາຍ ຍິງ 47 ສະຫາຍ.

ສະຫາຍ ບຸນຊູ ສຸດມາລີ ປະທານສະຫະພັນກໍາມະບານກົມປູກຝັງ ໄດ້ສະເໜີລາຍງານກ່ຽວກັບຜົນງານ ແລະບາງບົດຮຽນ ໃນການຊີ້ນໍາ-ນໍາພາຂອງກຳມະບານຮາກຖານກົມປູກຝັງຕະຫຼອດໄລຍະ 03 ປີ ຜ່ານມາ, ພ້ອມທັງກໍານົດທິດທາງແຜນການໃນຕໍ່ໜ້າ. ກອງປະຊຸມໃຫຍ່ໃນຄັ້ງນີ້, ຍັງໄດ້ພ້ອມກັນຄົ້ນຄວ້າປະກອບຄໍາຄິດເຫັນ ແລະເປັນເອກະພາບຮັບຮອງເອົາບົດສໍາຫຼວດການນໍາພາຮອບດ້ານຂອງຄະນະກໍາມະບານຮາກຖານ ກົມປູກຝັງ. ເພື່ອເຮັດໃຫ້ກອງປະຊຸມຄັ້ງທີ I ຂອງກໍາມະບານຮາກຖານ ກົມປູກຝັງ ມີຄວາມໝາຍຄວາມສຳຄັນ ສະຫາຍ ຄໍາພັນ ເໝືອນສິດທິດາ ໄດ້ປະກອບຄໍາຄິດເຫັນຕໍ່ກອງປະຊຸມດັ່ງກ່າວ ໂດຍສະເໜີໃຫ້ຄະນະກໍາມະບານ ຕ້ອງເພີ່ມທະວີເອົາໃຈໃສ່ສຶກສາອົບຮົມການເມືອງແນວຄິດ ຕໍ່ສະມາຊິກກໍາມະບານ ດ້ວຍການນໍາເອົາແນວທາງນະໂຍບາຍຂອງພັກ, ລະບຽບຂອງລັດໃຫ້ເລິກເຊິ່ງທົ່ວເຖິງ, ສືບຕໍ່ປັບປຸງ ແລະຂະຫຍາຍການຈັດຕັ້ງກໍາມະບານໃຫ້ກວ້າງຂວາງກວ່າເກົ່າ ໂດຍຕິດພັນກັບການປະຕິບັດຂໍແຂ່ງຂັນ 5 ເປັນເຈົ້າ. ນອກຈາກນີ້, ໄດ້ຄັດເລືອກເອົາຄະນະບໍລິຫານງານກໍາມະບານກົມປູກຝັງຊຸດໃໝ່ 5 ສະຫາຍເພື່ອສືບຕໍ່ປະຕິບັດແຜນການໃນຕໍ່ໜ້າ. ໂດຍຕົ­ກລົງເຫັນດີເລືອກເອົາ ສະຫາຍ ບຸນຊູ ສຸດມາລີ ເປັນປະທານກໍາມະບານຮາກຖານ, ສະຫາຍ ຫຼິງຫຼ້ອງ ສິດທິໄຊ ເປັນຮອງ ແລະ ສະຫາຍ ນາງ ບົວຈັນ ທຳມະລັດ ເປັນກຳມະການຮາກຖານ ທັງເປັນປະທານກວດກາ, ສະຫາຍ ຈັນສະໝອນ ພົມມະຈັນ ແລະສະຫາຍ ລັດສະໝອນ ພອນແກ້ວປະເສີດ ເປັນຄະນະ.

ສາມາຊິກກຳມະບານຮາກຸານກົມປູກຝັງ ແລະ ແຂກເຂົ້າຮ່ວມກອງປະຊຸມ

ຄະນະກຳມະບານຮາກຖານກົມປູກຝັງຊຸດໃໝ່

 

ຂຽນຂ່າວໂດຍ ສອນເພັດ ສີມອົມ

ກວດແກ້ໂດຍ: ທ່ານ ເຂັມພອນ ທິພົມມະຈັນ