DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

  • PDF

ລັດຖະມົນຕີກະຊວງກະສິກຳ ແລະ ປ່າໄມ້ ລົງເຮັດວຽກຢູ່ກົມປູກຝັງ

ອີງຕາມວາລະການຢ້ຽມຢາມ ແລະ ລົງເຮັດວຽກຢູ່ແຕ່ລະກົມ ອ້ອມຂ້າງກະຊວງກະສິກຳ ແລະ ປ່າໄມ້ ຂອງທ່ານ ປະຣິນຍາເອກ ລຽນ ທິແກ້ວ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງກະສິກຳ ແລະ ປ່າໄມ້

ໃນຕອນບ່າຍ ຂອງວັນທີ 27 ມີຖຸນາ 2016, ທ່ານ ວິໄລສຸກ ເຄນນະວົງ ຄະນະພັກກະຊວງກະສິກຳ ແລະ ປ່າໄມ້, ເລຂາຄະນະພັກຮາກຖານກົມປູກຝັງ, ຫົວໜ້າກົມປູກຝັງ ພ້ອມດ້ວຍຄະນະ ແລະ ວິຊາຫານຫຼັກແຫຼ່ງຂອງກົມປູກຝັງ ໄດ້ຕ້ອນຮັບ ທ່ານລັດຖະມົນຕີ ກະຊວງກະສິກຳ ແລະ ປ່າໄມ້ ພ້ອມດ້ວຍ ບັນດາທ່ານຫົວໜ້າກົມຕ່າງໆອ້ອມຂ້າງກະຊວງກະສິກຳ ແລະ ປ່າໄມ້ ຢ່າງເປັນທາງການ.

ໃນເບື້ອງຕົ້ນ ທ່ານ ວິໄລສຸກ ເຄນນະວົງ ໄດ້ລາຍງານ ໜ້າທີ່ພາລະບົດບາດ ການເຄື່ອນໄຫວ ຂອງຄະນະພັກຮາກຖານກົມປູກຝັງ ແລະ ວຽກງານອັນພົ້ນເດັ່ນຂອງກົມປູກຝັງໂດຍຫຍໍ້ ໃນໄລຍະຜ່ານມາ ແລະ ສະເໜີແຜນການຈັດຕັ້ງປະຕິບັດຈຸດສຸມ ໃນ 6 ເດືອນທ້າຍປີ 2016 ໂດຍສະເພາະ 6 ວຽກງານຫຼັກທີ່ສຳຄັນໃນກອບຂອງພາລະບົດບາດຂອງກົມປູກຝັງ ເຊັ່ນ: ວຽກງານນິຕິກຳ ແລະ ຄຸ້ມຄອງມະຫາພາກ, ວຽກງານປ້ອງພືດ, ວຽກງານກັກກັນພືດ, ວຽກງານກະສິກຳສະອາດ, ວຽກງານຄຸ້ມຄອງປັດໃຈການຜະລິດ ແລະ ວຽກງານການຜະລິດ

ຜ່ານການຮັບຟັງ ແລະ ການລາຍງານຂອງທ່ານ ໄລສຸກ ເຄນນະວົງ ແລ້ວ ທ່ານ ລັດຖະມົນຕີກະຊວງກະສິກຳ ແລະ ປ່າໄມ້ ກໍ່ໄດ້ຕີລາຄາສູງ ແລະ ຍ້ອງຍໍຊົມເຊີຍຕໍ່ຜົນສຳເລັດວຽກງານໃນແຕ່ລະດ້ານຂອງກົມປູກຝັງ, ຈາກນັ້ນ ທ່ານກໍ່ໄດ້ໃຫ້ທິດຊີ້ນຳໃຫ້ແກ່ກົມປູກຝັງ ເອົາໃຈໃສ່ເພີ່ມທະວີບາງວຽກຕົ້ນຕໍເຊັ່ນ: ໃຫ້ກົມປູກຝັງນຳໃຊ້ທ່າແຮງພາລະບົດບາດໜ້າຂອງກົມ ເພື່ອຊ່ວຍເຫຼືອປະຊາຊົນ ແລະ ຊາວກະສິກອນໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ, ສືບຕໍ່ປັບປຸງແກ້ໄຂບັນດາຂໍ້ຫຍຸ້ງຍາກຕ່າງໆໃນໄລຍະຜ່ານມາໃຫ້ດີຂື້ນ, ຕ້ອງໄດ້ເອົາໃຈໃສ່ຕື່ມການແກ້ໄຂ ແລະ ການປະສານງານ ໃນດ້ານການຜະລິດ ໃຫ້ ຕິດພັນກັບເສດຖະກິດຕະຫຼາດ ເຮັດຜົນການຜະລິດກາຍເປັນສິນຄ້າ ທີ່ໄດ້ມາດຕະຖານ

ຂ່າວໂດຍ: ຫຼິງຫຼ້ອງ ສິດທິໄຊ