DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

  • PDF

ລາວ-ໄທ ປຶກສາຫາລື ການປ້ອງກັນ ແລະ ຄວບຄຸມການລະບາດຂອງຕັກແຕນຝູງໄມ້ປ່ອງ

​ໃນ​ວັນ​ທີ 12 ກໍລະກົດ 2016 ທີ່​ ​ໂຮງ​ແຮມ ວຽງ​ຈັນ ພລາຊາ ນະຄອນຫຼວງ ວຽງຈັນ, ກົມ​ປູກຝັງ, ກະຊວງ​ກະສິກຳ​ແລະ ປ່າ​ໄມ້ ໄດ້ຈັດ​ກອງ​ປະຊຸມ​​ວິຊາ​ການ ກ່ຽວ​ກັບ ການ​ປ້ອງ​ກັນ ​ແລະ ຄວບ​ຄຸມ​ການລະບາດ​ຂອງ​ຕັກ​ແຕນ​ຝູງ​ໄມ້ປ່ອງ ຢູ່ ສປປ ລາວ ​ລະ​ຫວ່າງ ກົມ​ປູ​ກຝັງ, ກະຊວງ​ກະສິກຳ ​ແລະ ປ່າ​ໄມ້ ​ແຫ່ງ ສປປ ລາວ ​ແລະ ກົມ​ວິຊາ​ການ​ກະ​ເສດ, ກະຊວງ​ກະ​ເສດ ​ແລະ ສາ​ຫະກອນ ​ແຫ່ງ ຣາຊະ​ອານາຈັກ ​ໄທ.

ຈຸດປະສົງ​ຂອງ​ກອງ​ປະຊຸມ​ປຶກສາ​ຫາລື​ຄັ້ງນີ້ ​ແມ່ນ​ເພື່ອ​ສືບ​ຕໍ່​ຜັນ​ຂະຫຍາຍ​ເນື້ອ​ໃນ​ຂອງ​ບົດ​ບັນທຶກ​ກອງ​ປະຊຸມ​ຄັ້ງທີ 2 ຂອງ​ໜ່ວຍ​ງານ​ຮ່ວມ​ດ້ານ​ກະສິກຳ ລາວ-​ໄທ ​ເຊິ່ງ​ໄດ້​ຈັດ​ຂື້ນ ​ໃນ​ວັນ​ທີ 2-3 ທີ່ ​ແຂວງ ຫຼວງພະ​ບາງ, ສປປ ລາວ ໂດຍສະ​ເພາະ ​ແມ່ນ​​ເນັ້ນ​ໃສ່ປຶກສາ​ຫາລື ​ແລະ ​ແລ​ກປ່ຽນ​ບົດຮຽນ ກ່ຽວ​ກັບ ​ການ​ປ້ອງ​ກັນ ​ແລະ ຄວບ​ຄຸມ​ການລະບາດ​ຂອງ​ຕັກ​ແຕນ​ຝູງ​ໄມ້ປ່ອງ ຢູ່ ສປປ ລາວ.

​ສະພາບ​ການລະບາດ​ຂອງ​ຕັກ​ແຕນ​ຝູງ​ໄມ້ປ່ອງ ​ແມ່ນເລີ່​ມ​ແຕ່​ກາງ​ເດືອນ ​ເມສາ ປີ 2016 ມາຮອດ​ປັດ​ຈຸ​ບັນ ​​ໄດ້​ພົບ​ເຫັນ ຈຸດ​ວາງ​ໄຂ່​ຂອງ​​ຕັກ​ແຕນ​​ແຕກ​ເປັນ​ຕົວ​ອ່ອນຈຳນວນ 450 ຈຸດ, ​ກວມ​ເອົາ 188 ບ້ານ​ ​ໃນ 14 ​ເມືອງ ຂອງ ​​3 ແຂວງພາກ​ເໜືອ​ ຄື:​ ແຂວງ ຫຼວງພະ​ບາງ, ຫົວພັນ​ແລະ ຜົ້ງສາລີ​ ​ແລະ ຖ້າ​ທຽບ​​ໃສ່​ຂໍ້​ມູນ​ສຳ​ຫຼວດ​ໃນ​ປີ 2015 ​ເຫັນ​ວ່າ ການລະບາດ​ຂອງ​ຕັກ​​ແຕນ​ຝູງ​ໄມ້ປ່ອງ ​ໃນ​ປີ 2016 ໄດ້​​ເພີ່ມ​ຂື້ນ 221% ຂອງ​ຈຳນວນ​ຈຸດ​ສຳ​ຫຼວດ ​ໃນ​ປີ 2015. ສຳລັບ ພືດ​ທີ່​ຕັກ​ແຕນກັດກິນ​ເປັນ​ອາຫານ ​ສ່ວນ​​ໃຫຍ່​ແມ່ນ​ພືດ​ໃບ​ລ້ຽງ​ດ່ຽວ ​​ເປັນຕົ້ນ ​ແມ່ນ​​ໃບ​​ໃຜ່, ​ເຂົ້າ​ໄຮ່, ສາລີ ​ແລະ ພືດ​ອື່ນໆ.

ສຳລັບ ການ​ແກ້​ໄຂ​ບັນຫາ​ການລະບາດ​ຂອງ​ຕັກ​ແຕນ​ຝູງ​ໄມ້ປ່ອງ ທີ່​ຜ່ານ​ມາ ພາຍ​ຫຼັງທີ່​ລັດຖະບານ ​ຖືວ່າການລະບາດ​ຂອງ​ຕັກ​ແຕນ​ຝູງ​ໄມ້ປ່ອງ ຢູ່ ​ແຂວງ ຫຼວງພະ​ບາງ, ຫົວພັນ ​ແລະ ຜົ້ງສາລີ ​ເປັນ​​ໄພພິບັດ​ແຫ່ງ​ຊາດ, ລັດຖະບານ ​ໂດຍ​ສະ​ເພາະ ​ແມ່ນ​ກະຊວງ​ກະສິກຳ ​ແລະ ປ່າ​ໄມ້ ​​ໂດຍ​ແມ່ນ​ກົມ​ປູກຝັງ ​ເຊິ່ງ​ເປັນ​ກົມ​ວິຊາ​ການດ້ານ​ວຽກ​ງານ​ປ້ອງ​ກັນ​ພືດ ​​ໄດ້​ເອົາ​ໃຈ​ໃສ່​ປະສານ​ສົມທົບ​ກັບຂະ​ແໜງ​ການ​ທີ່​ກ່ຽວຂ້ອງ​ຂັ້ນສູນ​ກາງ ​ແລະ ອຳນາດ​ການ​ປົກຄອງທ້ອງ​ຖິ່ນທຸກຂັ້ນ ​ໃນ​​ເຂດ​ພື້ນ​ທີ່​ລະບາດ ​ແລະ ​ໄດ້​ຮັບ​ການ​ຮ່ວມ​ມື​ເປັນ​ຢ່າງ​ດີ​ຈາກ​ຂະ​ແໜງ​ການ​ທີ່​ກ່ຽວຂ້ອງ, ອຳນາດ​ການ​ປົກຄອງ​ທ້ອງ​ຖິ່ນ ຕະຫຼອດຮອດ​ປະຊາຊົນ​ຊາວ​ກະສິກອນ ​ໃນ​ເຂດ​ພື້ນ​ທີ່​ລະບາດ ​ແລະ ພື້ນ​ທີ່​ໄກ້​ຄຽງ ​ໃນ​ການຈັດຕັ້ງປະຕິ​ບັດ​ປ້ອງກັນ​ແລະ ຄວບ​ຄຸມ​ການລະບາດ​ຂອງ​ຕັກ​ແຕນ​ຝູງ​ໄມ້ປ່ອງ ດັ່ງກ່າວ ​ໂດຍ​ນຳ​ໃຊ້​ຫຼາຍມາດ​ຕະການ ​ປະສົມ​ປະສານ​ກັນ​ເປັນຕົ້ນ ​ແມ່ນ​ໄດ້​ອອກນິຕິ​ກຳຈັດ​ຕັ້ງປະຕິບັດ​, ​ໂຄສະນາ​ເຜີຍ​ແຜ່, ຝຶກ​ອົບຮົມ​ດ້ານ​ວິຊາ​ການ, ສະໜອງ​ເຄື່ອງມື​ອຸປະກອນ ​ແລະ ​ງົບປະມານ​ຈຳນວນ​ໜຶ່ງ. ພ້ອມ​ດຽວ​ກັນ ກໍ່​ໄດ້ປະສານ​ສົມທົບ ​ແລະ ​ໄດ້ຮັບ​ການ​ຊ່ວຍ​ເຫຼືອດ້ານ​ວິຊາ​ການ​ຈາກອົງການ​ອາຫານ ​ແລະ ການ​ກະ​ເສດ ປະຈຳ ສປປ ລາວ ​ແລະ ຈາກ ສປ ຈີນ ​ເພື່ອ​ມາ​ປະ​ກອບສ່ວນ​ຈັດຕັ້ງປະຕິ​ບັດ​ການ​ປ້ອງ​ກັນ ​ແລະ ຄວບ​ຄຸມ​ການລະບາດ​ຂອງ​ຕັກ​ແຕນ​ຝູງ​ໄມ້ປ່ອງ ຢູ່ 3 ​ແຂວງ​ພາກ​ເໜືອ ດັ່ງກ່າວ.

ສຳລັບ ​ໃນ​ກອງປະຊຸມ​ວິຊາການຄັ້ງນີ້ ສອງ​ຝ່າຍ ໄດ້​​​ລົງ​ເລິກປຶກສາ​ຫາລື ກ່ຽວ​ກັບ ການ​ປ້ອງ​ກັນ ​ແລະ ຄວບ​ຄຸມ​ການລະ​ບາດ​ຂອງ​ຕັ​ກ​ແຕນ​ຝູງ​ໄມ້ປ່ອງ ຢູ່ ສປປ ລາວ ໂດ​ຍທັງ​ສອງ​ຝ່າຍ ​ເຫັນ​ດີຮ່ວມ​ມື​ກັນ ດັ່ງ​ນີ້: 1) ສ້າງ​ໂຄງການ​ຮ່ວມ​ມື​ດ້ານ​ວິຊາ​ການ ກ່ຽວ​ກັບ ການ​ປ້ອງ​ກັນ ​ແລະ ຄວບ​ຄຸມ​ການ​ລະບາດ​ຂອງ​ຕັກ​ແຕນ​ຝູງ​​ໄມ້ປ່ອງ ຢູ່ ສປປ ລາວ, 2) ​​ສ້າງ​ທິມງານ​ສຶກສາຮ່ວມ​ກັນ ​ໂດຍ​ປະກອບ​ມີ​ພະນັກງານ​ວິຊາ​ການ​ຂອງ​ສອງ​ຝ່າຍ ​ເພື່ອ​​ເຮັດ​ການ​ສຶກສາ​ດ້ານ​ນິ​ເວດ​ວິທະຍາ ​ແລະ ວົງ​ຈອນ​ຊີວິດ​ຂອງ​ຕັກ​ແຕນ​ຝູງ​ໄມ້ປ່ອງ ຢູ່ ສປປ ລາວ ​ເພື່ອ​ການ​ປ້ອງ​ກັນ ​ແລະ ຄວບ​ຄຸມ​ໃນ​ໄລຍະ​ສັ້ນ ​ແລະ ​ໄລຍະ​ຍາວ. ນອກຈາ​ກນັ້ນ, ທັງ​ສອງ​ຝ່າຍ ຍັງ​ຢັ້ງຢືນ​​ເຖິງ​​ເຈດ​ຈຳນົງ​ຈັດຕັ້ງປະຕິບັດໂຄງການ​ຮ່ວມ​ມືດ້ານ​ວິຊາ​ການ ​ຕາມ​ບົດ​ບັນ​ທຶກ​ຂອງກອງ​ປະຊຸມຄັ້ງທີ 2 ຂອງ​ໜ່ວຍ​ງານ​ຮ່ວມ​ກະສິກຳ ລາວ-​ໄທ ​ເຊິ່ງກອງ​ປະຊຸມ ດັ່ງກ່າວ ​ໄດ້​ຈັດ​ຂື້ນ​​ໃນ​ວັນ​ທີ 2-3 ມິຖຸນາ 2016 ທີ່ ​ແຂວງ ຫຼວງພະ​ບາງ, ສປປ ລາວ ​ໃຫ້​​ປະກົດ​ຜົນ​ເປັນ​ຈິງ. ຕໍ່​ຈາກ​ນັ້ນ ສອງ​ຝ່າຍ ​ໄດ້​​ປຶກສາ​ຫາລື​​ ​ແລະ ​ເຫັນ​ດີ ທີ່​ຈະ​ຮ່ວມ​ມື​ດ້ານ​ວິຊາ​ການ ​ໃນໜ້າ​ວຽກ​ທີ່​ສຳຄັນ ​ເຊັ່ນ: ການ​ປ້ອງ​ກັນ​ພືດ, ​ການກັກ​ກັນ​ພືດ, ການ​ຄຸ້ມ​ຄອງ​ປັດ​​ໄຈ​ຂາ​ເຂົ້າການ​ຜະລິດ ​ເຊັ່ນ: ​ເມັດ​ພັນພືດ, ຝຸ່ນ ​ແລະ ຢາ​ປາບ​ສັດຕູ​ພືດ.​

​ເຂົ້າຮ່ວມ​ປຶ​ກສາ​ຫາລືໃນ​ກອງ​ປະຊຸມ​ຄັ້ງນີ້ ສຳລັບ ຄະນະວິຊາ​ການ​ຝ່າຍ ລາວ ນຳ​ໂດຍ​ທ່ານ ວິ​ໄລ​ສຸກ ​ເຄນ​ນະ​ວົງ, ຫົວໜ້າ​ກົມ​ປູກຝັງ, ກະຊວງ​ກະສິກຳ ​ແລະ ປ່າ​ໄມ້ ​ແຫ່ງ ສປປ ລາວ ພ້ອມ​ຄະນະ ​ແລະ ຄະນະ​ວິຊາ​ການ​ຝ່າ​ຍ ​ໄທ ນຳ​ໂດຍ​ທ່ານ ສົມ​ຊາຍ ຈັນ​ນະຣົງກຸນ, ອະທິບໍດີ​ກົມ​ວິຊາ​ການ​ກະ​ເສດ, ກະຊວງ​ກະ​ເສດ ​ແລະ ສາຫະກອນ ​ແຫ່ງ ຣາຊະ​ອານາຈັກ ​ໄທ ພ້ອມ​ຄະນະ.

​ແຫຼ່ງຂ່າວ: ທ້າວ ສະຫຼອງ​ໄຊ ລາດ​ຊະບຸ​ດ, ກົມ​ປູກຝັງ, ກະຊວງ​ກະສິກຳ ​ແລະ ປ່າ​ໄມ້,

​ໂທ: 021 412350, ມື​ຖື: 020 23043393,

email: This e-mail address is being protected from spambots. You need JavaScript enabled to view it