DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

  • PDF

ວຽກງານຂໍ້ມູນຂ່າວສານ ແລະ ວຽກງານແຜນການ ຂອງຂະແໜງປູກຝັງ ແຂວງຈຳປາສັກ ແລະ ແຂວງສາລາວັນໄດ້ຮັບການປັບປຸງໃຫ້ດີຂື້ນ

  • Tuesday, 15 August 2017 14:47
  • Last Updated Wednesday, 16 August 2017 07:59
  • Written by Thipphaphone Chanphengxay

ໃນລະຫວ່າງວັນທີ 23 – 26 ກໍລະກົດ ທີ່ຜ່ານມາ ພະແນກແຜນການ ແລະ ການຮ່ວມມື, ກົມປູກຝັງ ໄດ້ຈັດກອງປະຊຸມ ເຜີຍແຜ່ຍຸດທະສາດ ພັດທະນາ ຂະແໜງປູກຝັງຮອດປີ 2025 ແລະ ວິໄສທັດ ຮອດປີ 2030 ພ້ອມດ້ວຍຝຶກອົບຮົມ ການປັບປຸງຖານຂໍ້ມູນຂ່າວສານ ແລະ ເຊື່ອມໂຍງແຜນການ ຂະແໜງປູກຝັງ ຢູ່ທີ່ ຫ້ອງປະຊຸມ ພະແນກກະສິກຳ ແລະ ປ່າໄມ້ ແຂວງສາລາວັນ ແລະ ແຂວງຈຳປາສັກ ໃຫ້ກຽດເປັນປະທານກອງປະຊຸມໂດຍ ທ່ານ ບຸນຈັນ ກົມບຸນຍາສິດ ຮອງຫົວໜ້າກົມປູກຝັງ, ທ່ານ ກອງແລ ວໍລະວົງ ຮອງຫົວໜ້າພະແນກ ກະສິກຳ ແລະ ປ່າໄມ້ ແຂວງສາລາວັນ. ທ່ານ ວຽງໄຊ ສີປະພອນ ຮອງຫົວໜ້າພະແນກ ກະສິກຳ ແລະ ປ່າໄມ້ ແຂວງຈຳປາສັກ ພ້ອມດ້ວຍຕ່າງໜ້າພະນັກງານເມືອງຂອງ 2 ແຂວງເຂົ້າຮ່ວມ.

ກອງປະຊຸມ ທ່ານ ປອ ພັນປະດິດ ພັນດາລາ ຫົວໜ້າພະແນກແຜນການ ແລະ ຮ່ວມມື ເຜີຍແຜ່ຍຸດທະສາດຂະແໜງປູກຝັງ ຮອດປີ 2025 ແລະ ວິໄສທັດ ຮອດປີ 2030 ໃຫ້ແກ່ພະນັກງານ ຂັ້ນແຂວງ ແລະ ເມືອງ, ການ​​ເຊື່ອມ​ໂຍງ​ແຜນ​ການ​ຜະ​ລິດ, ແຜນ​ງົບ​ປະ​ມານ ແລະ ການ​ເຊື່ອມ​ໂຍງ​ຂໍ້​ມູນ​ຂ່າວ​ສານ ຂະ​ແໜງ​ການ​ປູກ​ຝັງ​ໃຫ້​ມີ​ຄວາມ​ວ່ອງ​ໄວ ແລະ ເປັນ​ລະ​ບົບ.ການປັບ​ປຸງ​ລະ​ບົບ ແລະ ໂຄງ​ຮ່າງ​ບົດ​ລາຍງ​ງານ​ສະ​ພາບ​ການ​ຜະ​ລິດ​ພືດ​ລະ​ດູ​ແລ້ງ, ລະ​ດູ​ຝົນ ແລະ ພືດ​ສິນ​ຄ້າ​ອຶ່ນໆ​ໃຫ້​ເປັນ​ລວງ​ດຽວ​ກັນ ແລະ ປຶກ​ສາ​ຫາ​ລື ໃນ​ການ​ວາງ​ແຜນການຈັດຕັ້ງປະຕິບັດ ໂຄງ​ການ​ສະ​ໜັບ​ສະ​ໜູນ​ການ​ຜະ​ລິດ​ກະ​ສິ​ກຳ​ເປັນ​ສິນ​ຄ້າ ແລະ ຄ້ຳ​ປະ​ກັນ​ສະ​ບຽງ​ອາ​ຫານ ຕາມ​ມາດ​ຕະ​ຖານ​ກະ​ສິ​ກຳ​ສະ​ອາດ.

ຜົນໄດ້ຮັບຂອງການຝຶກອົບຮົມຄັ້ງນີ້ ເຮັດໃຫ້ພະນັກງານຂະແໜງປູກຝັງ ແລະ ພະນັກງານຫ້ອງການກະສິກຳ ແລະ ປ່າໄມ້ ເມືອງ ​ໃນ 2 ແຂວງ ​ແລະ ພະນັກງານ​ຈາກ​ສູນ​ກາງ (ກົມ​ປູກຝັງ) ​ໄດ້ມີ​ການ​ຖອດ​ຖອນ ​ແລກ ປ່ຽນບົດຮຽນ​ເຊິ່ງກັນ ​ແລະ ກັນ ກ່ຽວກັບ ​ການຈັດຕັ້ງປະຕິບັດ​ວຽກງານ​ຂອງ​ຂະ​ແໜງການ​ປູກຝັງ​ໃນ​ໄລຍະ​ຜ່ານ​ມາ ​ໂດຍ​ສະ​ເພາະ​ ສະພາບ​ບັນຫາ ​ແລະ ທ່າ​ແຮງ​ແຕ່ລະ​ທ້ອງ​ຖິ່ນ, ໃຫ້ມີ​ຄວາມ​ຮັບ​ຮູ້ ​ແລະ ເຂົ້າ​ໃຈ ກ່ຽວກັບ​ ແນວທາງ​ໃນ​ການ​ພັດທະນາ ຂະ​ແໜງການ​ປູກຝັງ ​ແຕ່​ນີ້ ຮອດ​ປີ 2025 ພ້ອມ​ທັງວິ​ໃສ​ທັດ ​ຮອດ​ປີ 2030, ສາມາດຍົກລະດັບຄວາມຮູ້ທາງດ້ານວິຊາການ ​ໃຫ້​ແກ່ພະນັກງານ​​ຂະແໜງການປູກຝັງ​ 2 ແຂວງ ​ແລະ ​ວິຊາ​ການໜ່ວຍງານ​ປູກຝັງເມືອງ ​ໂດຍ​ສະ​ເພາະ ການ​ວາງ​ແຜນ, ການສະຫຼຸບການ​ຜະລິດ ​ແລະ ການ​ຈັດການ​ຖານ​ຂໍ້​ມູນ​ດ້ານ​ປູກຝັງພ້ອມ​ທັງ​ສາມາດ​ຄິດ​ໄລ່​ການ​ຄາດ​ຄະ​ເນ​ການ​ດຸ່ນດ່ຽງ​ເຂົ້າກິນ​ປະຈຳ​ປີ​ຂອງ​ເມືອງ ​ແລະ ​ແຂວງ ຕົນ​ເອງ.

ພ້ອມດຽວກັນນັ້ນຍັງ ໄດ້​ມີ​ຄວາມ​ເປັນ​ເອ​ກະ​ພາບ​ກັນ ໃນ​ການຈັດຕັ້ງປະຕິບັດ ໂຄງ​ການ​ສະ​ໜັບ​ສະ​ໜູນ​ການ​ຜະ​ລິດ​ກະ​ສິ​ກຳ​ເປັນ​ສິນ​ຄ້າ ແລະ ຄ້ຳ​ປະ​ກັນ​ສະ​ບຽງ​ອາ​ຫານ ຕາມ​ມາດ​ຕະ​ຖານ​ກະ​ສິ​ກຳ​ສະ​ອາດ ລະ​ຫວ່າງ ກົມ​ປູກ​ຝັງ ແລະ ຂະ​ແໜງ​ປູກ​ຝັງ, ພະ​ແນກ​ກະ​ສິ​ກຳ ແລະ ປ່າ​ໄມ້ ຂອງ ແຂວງຈຳປາສັກ ແລະ ແຂວງສາລາວັນ ອີກດ້ວຍ.

ຂ່າວໂດຍ : ນາງ ທິບພະພອນ ຈັນເພັງໄຊ

ພາບບັນຍາກາດກອງປະຊຸມ ທີ່ ພະແນກກະສິກຳ ແລະ ປ່າໄມ້ ແຂວງສາລາວັນ