DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

  • PDF

ກອງປະຊຸມ ປຶກສາຫາລືດ້ານວິຊາການ ກ່ຽວກັບ ການຮ່ວມມື ລະຫວ່າງ ກົມປູກຝັງ ສປປ ລາວ ແລະ ກົມວິຊາການກະເສດ ແຫ່ງຣາຊາອານາຈັກ ໄທ

  • Monday, 04 September 2017 10:28
  • Last Updated Tuesday, 05 September 2017 04:15
  • Written by Thipphaphone Chanphengxay

ໃນວັນທີ 28 ສິງຫາ 2017 ທີ່ ຫ້ອງປະຊຸມກົມປູກຝັງ, ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມປຶກສາຫາລືດ້ານວິຊາການ ກ່ຽວກັບ ການຮ່ວມມື ລະຫວ່າງ ກົມປູກຝັງ, ກະຊວງກະສິກຳ ແລະ ປ່າໄມ້ ແຫ່ງ ສປປ ລາວ ແລະ ກົມວິຊາການກະເສດ, ກະຊວງກະເສດ ແລະ ສະຫະກອນ ແຫ່ງຣາຊາອານາຈັກ ໄທ, ເຊີ່ງຝ່າຍລາວ ນຳໂດຍ ທ່ານ ວິໄລສຸກ ເຄນນະວົງ, ຫົວໜ້າກົມປູກຝັງ, ກະຊວງກະສິກຳ ແລະ ປ່າໄມ້ ແຫ່ງ ສປປ ລາວ ພ້ອມດ້ວຍຄະນະ ແລະ ຝ່າຍໄທ ນຳໂດຍ ທ່ານ ຊູວິດ ໄຊກຽດຕິຍົດ, ອະທິບໍດີກົມກະເສດ, ກະຊວງກະເສດ ແລະ ສະຫະກອນ ແຫ່ງ ຣາຊາອານາຈັກໄທ ພ້ອມຄະນະ.

ຈຸດປະສົງຂອງກອງປະຊຸມປຶກສາຫາລືຄັ້ງນີ້ ແມ່ນເພື່ອສຶບຕໍ່ຜັນຂະຫຍາຍເນື້ອໃນຂອງບົດບັນທຶກຄວາມເຂົ້າໃຈ ກ່ຽວກັບ ການຮ່ວມມືດ້ານການກະສິກຳ ລະຫວ່າງ ກະຊວງກະສິກຳ ແລະ ປ່າໄມ້ ແຫ່ງ ສປປ ລາວ ແລະ ກະຊວງກະເສດ ແລະ ສະຫະກອນ ແຫ່ງ ຣາຊາອານາຈັກໄທ ທີ່ໄດ້ລົງນາມ ປີ 2013 ໂດຍສະເພາະແມ່ນການຈັດຕັ້ງຜັນຂະຫຍາຍຜົນຂອງກອງປະຊຸມຄັ້ງທີ 3 ຂອງໜ່ວຍງານຮ່ວມດ້ານກະສິກຳ ລາວ-ໄທ, ໄທ-ລາວ ເຊິ່ງໄດ້ຈັດຂື້ນໃນຕົ້ນເດືອນ ສິງຫາ 2017 ທີ່ ຈັງຫວັດຂອນແກ່ນ, ຣາຊາອານາຈັກໄທ.

ໃນກອງປະຊຸມຄັ້ງນີ້ ທັງສອງຝ່າຍ ຈະໄດ້ເນັ້ນໃສ່ປຶກສາຫາລື, ແລກປ່ຽນບົດຮຽນ ແລະ ລາຍງານຄວາມຄືບໜ້າ ກ່ຽວກັບ ການຈັດຕັ້ງປະຕິບັດວຽກງານປ້ອງກັນ ແລະ ຄວບຄຸມການລະບາດຂອງຕັ້ກແຕນຝູງໄມ້ປ່ອງ, ການເປີດຕະຫຼາດສິນຄ້າກະສິກຳຈຳນວນໜຶ່ງ ແລະ ແຜນການຮ່ວມມືໃນຕໍ່ໜ້າ ເຊັ່ນ: ການສ້າງຄວາມເຂັ້ມແຂງໃຫ້ແກ່ການປ້ອງກັນ ແລະ ຄວບຄຸມການລະບາດຂອງຕັກແຕນຝູງໄມ້ປ່ອງ ຢູ່ ສປປ ລາວ, ການກວດສອບພືດ ແລະ ຜະລິດຕະພັນພືດນຳເຂົ້າ ແລະ ສົ່ງອອກ, ການຄຸ້ມຄອງປັດໄຈການຜະລິດ, ການປ້ອງກັນພືດ ແລະ ການຜະລິດກະສິກຳອິນຊີ. ພາຍຫຼັງສີ້ນສຸດກອງປະຊຸມ ທັງສອງຝ່າຍ ຈະໄດ້ເຮັດບົດບັນທຶກຮ່ວມກັນ ເພື່ອເປັນບ່ອນອີງໃນການຈັດຕັ້ງປະຕິບັດ. ກອງປະຊຸມຄັ້ງນີ້ ດຳເນີນໄປເປັນເວລາເຄີ່ງວັນ ຈິ່ງສີ້ນສຸດລົງ.

ຫຼັງສຳເລັດ ກອງປະຊຸມປຶກສາຫາລືກັນແລ້ວ ຄະນະວິຊາການຈຳນວນໜຶ່ງ ກົມປູກຝັງ, ກະຊວງກະສິກຳ ແລະ ປ່າໄມ້ ແຫຼ່ງ ສປປ ລາວ ແລະ ກົມວິຊາການກະເສດ, ກະຂວງກະເສດ ແລະ ສະຫະກອນ ແຫ່ງ ຣາຊາອານາຈັກໄທ ໄດ້ເດີນທາງໄປເຮັດວຽກ ຢູ່ແຂວງຊຽງຂວາງ ເພື່ອລົງສຳຫຼວດ ແລະ ຕິດຕາມສະພາບການລະບາດ ຂອງຕັກແຕນຝູງໄມ້ປ່ອງ ຈົນຮອດວັນທີ 31 ສິງຫາ.

 

ແຫຼ່ງຂ່າວໂດຍ: ສະຫຼອງໄຊ ລາດສະບຸດ