DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

ກົມປູກຝັງ ເຂົ້າຮ່ວມພິທີປູກຕົ້ນໄມ້ 4.400 ເບ້ຍ ທີ່ສູນຄົ້ນຄວ້າປ່າໄມ້ ນໍ້າຊວງ

ໃນວັນທີ 31 ພຶດສະພາ 2018 ຜ່ານ​ມາ​ນີ້, ກົມປູກຝັງ ໄດ້ເຂົ້າຮ່ວມພິທີປູກຕົ້ນໄມ້ຂື້ນທີ່ສູນຄົ້ນຄວ້າປ່າໄມ້ ນໍ້າຊວງ, ໂດຍການເຂົ້າຮ່ວມ ຂອງ ທ່ານ ປອ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກຳ ແລະ ປ່າໄມ້, ບັນດາຮອງລັດຖະມົນຕີ, ຫົວໜ້າກົມ, ຮອງຫົວໜ້າກົມ, ເຈົ້າເມືອງ, ຮອງເຈົ້າເມືອງ, ອຳນາດການປົກຄອງທ້ອງຖິ່ນ, ນັກທຸລະກິດ, ອົງການຈັດຕັ້ງສາກົນ, ຊາວໜຸ່ມ ແລະ ນ້ອງນ້ອຍເຍົາວະຊົນ​ເຂົ້າ​ຮ່ວມຢ່າງເປັນຂະບວນຟົດຟື້ນ.

ເບ້ຍ​ໄມ້​ທີ່​ນໍາ​ມາ​ປູກ​ໃນຄັ້ງ​ນີ້​ມີທັງໝົດ 4.400ເບ້ຍ, ຊຶ່ງແມ່ນໄມ້ພື້ນເມືອງທີ່ມີຄ່າຂອງລາວເຮົາເຊັ່ນ: ໄມ້ຂະຍຸງ, ໄມ້ດູ່, ໄມ້ແຕ້ຂ່າ, ໄມ້ແຄນ ແລະ ໄມ້ຍາງ ​ເບ້ຍ​ໄມ້​ດັ່ງກ່າວ​ໄດ້​ປູກໃນເຂດຄຸ້ມຄອງ ຂອງສູນຄົ້ນຄວ້າປ່າໄມ້ນໍ້າ​ຊວງໃນເນື້ອທີ່ປະມານ 4 ເຮັກຕາ, ໂດຍມີຈຸດປະສົງແນໃສ່ປູກເພື່ອໃຫ້ກາຍເປັນປ່າ ແລະ ເປັນແຫຼ່ງຕົ້ນໄມ້ພໍ່ພັນແມ່ພັນສະໜອງແກ່ນໄມ້ໃຫ້ແກ່ການປູກໄມ້ໃນອານາຄົດ.

​ໃນ​ພິທີ​ທ່ານ ທອງ​ພັດ ​ວົງ​ມະນີ ຮອງ​ລັດຖະມົນຕີ​ກະຊວງ​ກະສິກໍາ ​ແລະ ປ່າ​​ໄມ້ ​ໄດ້​ລາຍ​ງານ​ກ່ຽວ​ກັບ​ສະພາບ​ການ​ເຄື່ອນ​ໄຫວ ​ແລະ ຜົນງານ​ການ​ປູກ​ໄມ້​ໃນ​ໄລຍະ​ຜ່ານ​ມາ​ວ່າ: ຜ່ານການເຄື່ອນໄຫວວຽກງານປູກໄມ້ຕົວຈິງໃນໄລຍະທີ່ຜ່ານມາ ໄດ້ເຮັດໃຫ້ເນື້ອທີ່ໄມ້ປູກເພີ່ມຂຶ້ນຈາກ 452 ເຮັກຕາ ໃນປີ 1978 ມາເປັນ 1.384 ເຮັກຕາ ໃນປີ 1985 ເພີ່ມຂຶ້ນປະມານ 3 ເທົ່າ ເມື່ອທຽບກັບຕົວເລກການປູກໄມ້ ກ່ອນການກຳນົດວັນປູກຕົ້ນໄມ້ແຫ່ງຊາດ ແລະ ຈາກນັ້ນມາ ດ້ວຍການນຳພາຢ່າງໃກ້ຊິດ ຂອງການນຳພັກ-ລັດຂັ້ນຕ່າງໆ ບວກກັບຄວາມຕື່ນຕົວຂອງປະຊາຊົນບັນດາເຜົ່າ ແລະ ການເປີດກວ້າງການລົງທຶນ ໄດ້ເຮັດໃຫ້ເນື້ອທີ່ການປູກໄມ້ ນັບມື້ເພີ່ມຂຶ້ນຢ່າງຕໍ່ເນື່ອງ. ມາເຖິງປີ 2018 ກະຊວງກະສິກໍາ ແລະ ປ່າໄມ້ ມີເນື້ອທີ່ປູກໄມ້ທັງໝົດໃນທົ່ວປະເທດ ເຖິງ 478.557 ເຮັກຕາ ຫລື ເທົ່າກັບ 95,7 ສ່ວນຮ້ອຍ ຂອງແຜນການປູກໄມ້ຮອດປີ 2020 ຂອງລັດຖະບານ, ອັນພົ້ນເດັ່ນ ແມ່ນຂະບວນການປູກໄມ້ເປັນສິນຄ້າເຊັ່ນ: ໄມ້ສັກ, ໄມ້ວິກ, ໄມ້ເກດສະໜາ ແລະ ຢາງພາລາ ຂອງຊາວກະສິກອນ ຂອງພະນັກງານ, ທະຫານ, ຕຳຫລວດ, ກໍຄືນັກລົງທຶນທັງພາຍໃນ ແລະ ຕ່າງປະເທດ.

ໃນ​ໂອກາດ​ດັ່ງກ່າວ​ນີ້​, ທ່ານ ປອ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ພ້ອມ​ດ້ວຍ​ການ​ນໍາ​ກະຊວງ​ກະສິກໍາ ​ແລະ ປ່າ​ໄມ້ ແລະ ກົມ, ສະຖາບັນ ແລະ ສູນອ້ອມຂ້າງ ກະຊວງ ​ກໍ່​ໄດ້​ຮ່ວມ​ການ​ປູກ​ຕົ້ນ​ໄມ້, ຈາກ​ນັ້ນ​ກໍ່​ໄດ້​ໄປຢ້ຽມຢາມ ​ແລະ ຮັບ​ຟັງ​ການ​ລາຍ​ງານ​ການຈັດ​ຕັ້ງ​ປະຕິບັດ​ວຽກ​ງານ​ຂອງ​ສູນຄົ້ນຄວ້າ​ປ່າ​ໄມ້ທ່ຽວຊົມ​ແຫຼ່ງຕົ້ນ​ໄມ້​ພໍ່​ແມ່​ພັນ, ສວນປູກ​ຫວາຍ ​ແລະ ຟາ​ມລ້ຽມ​ໝູ UDA ທີ່​ ບ້ານ​ໃໝ່ ​ເມືອງ ​ໂພນ​ໂຮງ ​ແຂວງ​ວຽງ​ຈັນ ນໍາ​ອີກ.

ສຳລັບກົມປູກຝັງ ມີຜູ້ເຂົ້າຮ່ວມທັງໝົດ 12 ທ່ານ, ນໍາໂດຍທ່ານ ບຸນຈັນ ກົມບຸນຍະສິດ ຮອງຫົວໜ້າກົມປູກຝັງ ປູກໄມ້ແຕ້ຂ່າ ຈໍານວນ 200 ເບ້ຍ, ເພື່ອ​ເປັນ​ການ​ສ້າງ​ຂະບວນການ​ປູກ​ຕົ້ນ​ໄມ້​ເນື່ອງ​ໃນ​ວັນ​ປູກ​ຕົ້ນ​ໄມ້​ແຫ່ງ​ຊາດ ​ແລະ ສະ​ເຫຼີ​ມສະຫຼອງວັນ​ເດັກນ້ອຍ​ສາກົນ ຄົບຮອບ 38 ປີ (1 ມິຖຸນາ 1980-1 ມິຖຸນາ 2018) ​ໃຫ້​ເປັນ​ຂະ​ບວນຟົດ​ຟື້ນ ​ເພື່ອແນ່ໃສ່ບັນລຸເປົ້າໝາຍໃຫ້ມີປ່າປົກຫຸ້ມ 70 ສ່ວນຮ້ອຍ ແລະ ປູກໄມ້ໃຫ້ໄດ້ 500.000 ເຮັກຕາ ໃນປີ 2020 ຕາມຍຸດທະສາດພັດທະນາປ່າໄມ້ ຂອງລັດຖະບານ ກໍຄືຕາມທິດການພັດທະນາສີຂຽວ ແລະ ຍືນຍົງ.