DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

ຄະນະນໍາກົມປູກຝັງ ເຂົ້າຮ່ວມພິທີວັນປູກຕົ້ນໄມ້ ແຫ່ງຊາດ ທີ່ວິທະຍາຄານປ້ອງກັນຊາດ ໄກສອນ ພົມວິຫານ

ໃນວັນທີ 1 ມີຖນາ 2018 ຜ່ານ​ມາ​, ກົມປູກຝັງ ໄດ້ເຂົ້າຮ່ວມພິທີປູກຕົ້ນໄມ້ຂື້ນທີ່ ວິທະຍາຄານປ້ອງກັນຊາດ ໄກສອນ ພົມວິຫານ, ໃຫ້ກຽດເຂົ້າຮ່ວມໂດຍ ທ່ານ ພົນໂທ ຈັນສະໝອນ ຈັນຍາລາດ, ກໍາມະການກົມການເມືອງສູນກາງພັກ, ລັດຖະມົນຕີ ກະຊວງປ້ອງກັນປະເທດ, ທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກຳ ແລະ ປ່າໄມ້, ບັນດາຮອງລັດຖະມົນຕີ, ທ່ານ ພົນຈັດຕະວາ ຄໍາຫຼ້າ ໄຊຍະສຸກ ກໍາມະການພັກກະຊວງປ້ອງກັນປະເທດ, ຫົວໜ້າການເມືອງວິທະຍາຄານປ້ອງກັນຊາດ ໄກສອນ ພົມວິຫານ, ພ້ອມນີ້ຍັງມີ ຄະນະພັກ ຄະນະບັນຊາ, ຫົວໜ້າ, ຮອງ

ຫົວໜ້າຫ້ອງການ ຫົວໜ້າກົມ, ຮອງຫົວໜ້າກົມ, ພ້ອມດ້ວຍ ຕົວແທນຈາກ 3 ອົງການຈັດຕັ້ງມະຫາຊົນ ແລະ ນ້ອງນ້ອຍເຍົາວະຊົນ​ເຂົ້າ​ຮ່ວມຢ່າງພ້ອມພຽງ ເປັນຂະບວນຟົດຟື້ນ.

 

ໃນພິທີ ໄດ້ລາຍງານໃຫ້ຮູ້ ກ່ຽວກັບ ຈຸດປະສົງການປູກໄມ້ ໃນວັນທີ 1 ມີຖຸນາ ວັນປູກຕົ້ນໄມ້ແຫ່ງຊາດ ໂດຍ​ທ່ານ ທອງ​ພັດ ​ວົງ​ມະນີ ຮອງ​ລັດຖະມົນຕີ​ກະຊວງ​ກະສິກໍາ ​ແລະ ປ່າ​​ໄມ້, ຈາກນັ້ນ ທ່ານ ພັນເອກ ປອ ແກ້ວສຸວັນ ອິນທະວົງສາ, ຫົວໜ້າການທະຫານ ວິທະຍາຄານ ປ້ອງກັນຊາດ ໄກສອນ ພົມວິຫານ ໄດ້ກ່າວມີຄໍາເຫັນຕໍ່ ຄວາມໝາຍຄວາມສໍາຄັນ ຂອງຊັບພະຍາກອນທໍາມະຊາດ ໂດຍສະເພາະ ຊັບພະຍາກອນປ່າໄມ້, ການປູກໄມ້ ໃນຄັ້ງນີ້ ແມ່ນມີຈຸດປະສົງແນ່ໃສ່ ສົ່ງເສີມການປູກໄມ້ພື້ນເມືອງ ທີ່ມີຄ່າ ຂອງລາວເຮົາ ເພື່ອໃຫ້ກາຍເປັນແຫຼ່ງຕົ້ນໄມ້ພໍ່ພັນ, ແມ່ພັນໃນອານາຄົດ, ເພີ່ມຄວາມສີຂຽວງົດງານ ໃຫ້ແກ່ ວິທະຍາຄານປ້ອງກັນຊາດ ໄກສອນ ພົມວິຫານ ທັງເປັນການປະກອບສ່ວນໃນການຈັດຕັ້ງປະຕິບັດ ຄໍາຂັວນ 6 ສໍ ເວົ້າລວມ ໂດຍສະເພາະ ແມ່ນສໍ ສີຂຽນ ແລະ ສໍ ສະເໜ່ ຂອງນະຄອນຫຼວງວຽງຈັນ, ປະກອບສ່ວນໃນການຈັດຕັ້ງປະຕິບັດ ແຜນການປູກໄມ້ 27,000 ເຮັກຕາ ປະຈໍາປີ 2018 ຂອງກະຊວງກະສິກໍາ ແລະ ປ່າໄມ້, ກໍ່ຄືການປະກອບເຂົ້າໃນການຈັດຕັ້ງປະຕິບັດຍຸດທະສາດປ່າໄມ້ ຂອງລັດຖະບານ ຄື ເພີ່ມປົກຫຸ້ມປ່າໄມ້ ໃຫ້ໄດ້ 70 ສ່ວນຮ້ອຍ ແລະ ປູກໄມ້ໃຫ້ໄດ້ 500,000 ເຮັກຕາ ໃນປີ 2020. ເບ້ຍໄມ້ທີ່ໄດ້ນໍາມາປູກໃນຄັ້ງນີ້ ມີທັງ   ໝົດປະມານ 2,000 ເບ້ຍ, ໃນນັ້ນມີໄມ້ກະຍຸງ, ໄມ້ດູ່, ໄມ້ແຕ່ຄ່າ, ໄມ້ແຄນ ແລະ ໄມ້ຍາງ ເຊີ່ງໄດ້ມາຈາກການປະກອບສ່ວນ ຂອງກະຊວງກະສິກໍາ ແລະ ປ່າໄມ້. ໃນພິທີດັ່ງກ່າວ ຄະນະນໍາ, ຄະນະບັນຊາການ ຈາກກະຊວງປ້ອງກັນປະເທດ ແລະ ຄະນະນໍາຈາກກະຊວງກະສິກໍາ ແລະ ປ່າໄມ້ ໄດ້ຮ່ວມກັນປູກຕົ້ນໄມ້ກັບບັນດາແຂກທີ່ເຂົ້າຮ່ວມຢ່າງເປັນຂະບວນການຄືກຄື້ນ.