DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

ຄະນະນຳກົມປູກຝັງ ຕິດຕາມ ການນໍາກະຊວງລົງເຮັດວຽກຢູ່ເຂດໄພນໍ້າຖ້ວມ ຢູ່ແຂວງ ຄໍາມ່ວນ

ໃນຕອນວັນທີ 30 ກໍລະກົດ 2018 ທີ່ຜ່ານມາ, ທ່ານ ວິໄລສຸກ ເຄນນະວົງ ຫົວໜ້າກົມປູກຝັງ ກະຊວງກະສິກຳ ແລະ ປ່າໄມ້ ລົງຕິດຕາມເຮັດວຽກຢູ່ເຂດປະສົບໄພທາງທໍາມະຊາດ(ນໍ້າຖ້ວມ) ແຂວງ ຄໍາມ່ວນ. ຈຸດປະສົງແມ່ນເພື່ອຕິດຕາມສະພາບຜົນກະທົບຂອງນ້ຳຖ້ອມຕໍ່ກັບສະພາບການຜະລິດກະສິກຳ ແລະ ມາດຕະການໃນການແກ້ໄຂສະເພາະໜ້າ ແລະ ໄລຍະຍາວ.

ໃນການລົງມາເຮັດວຽກຄັ້ງນີ້ ໄດ້ຮັບຟັງການລາຍງານຂໍ້ມູນເບື້ອງຕົ້ນ ຈາກ ທ່ານ ບຸນຈັນ ໄຊປັນຍາ ຫົວໜ້າພະແນກກະສິກໍາ ແລະ ປ່າໄມ້ ແຂວງຄໍາມ່ວນ ໄດ້ລາຍງານໃຫ້ຮູ້ວ່າ: ສໍາລັບໄພພິບັດທາງທໍາມະຊາດທີ່ເກີດຂຶ້ນພາຍໃນແຂວງເປັນຕົ້ນ: ແມ່ນສະພາບໄພນໍ້າຖ້ວມ, ນັບແຕ່ວັນທີ 23 ກໍລະກົດ 2018 ຜ່ານມາໄດ້ມີຝົນຕົກຢ່າງຕໍ່ເນື່ອງເຮັດໃຫ້ນໍ້າເຊບັ້ງໄຟ, ນໍ້າຫີນບູນ, ນໍ້າເຊນ້ອຍ ລົ້ນຝັງ ໄຫຼເຂົ້າຖ້ວມ

ບ້ານເຮືອນ, ເນື້ອທີ່ນາ, ພືດສວນ ແລະ ເຮັດໃຫ້ສັດລ້ຽງຕາຍຍ້ອນນໍ້າຖ້ວມອີກຈໍານວນໜຶ່ງ.

ເພື່ອແກ້ໄຂສະພາບທີ່ເສຍຫາຍດັ່ງກ່າວ, ຄະນະການນຳກະຊວງກະສິກຳ ແລະ ປ່າໄມ້ ເຊິ່ງຕາງໜ້າໂດຍ ທ່ານ ປອ.ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະປ່າໄມ້ ໄດ້ສະແດງຄວາມຊົມເຊີຍມາຍັງພະແນກກະສິກຳ ແລະ ປ່າໄມ້ ແຂວງຄຳມ່ວນ ທີ່ໄດ້ເອົາໃຈໃສ່ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ໂດຍສະເພາະແມ່ນການສັງລວມ ເກັບກຳຂໍ້ມູນ, ຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ອມ ພ້ອມທັງມອບເງິນຊ່ວຍເຫຼືອໃຫ້ພະແນກກະສິກໍາ ແລະ ປ່າໄມ້ ແຂວງຄໍາມ່ວນ ຈໍານວນ 100 ລ້ານກີບ. ຈາກນັ້ນ ຕິດຕາມເຮັດວຽກນໍາປະຊາຊົນຜູ້ທີ່ຖືກຜົນກະທົບຢູ່ເຂດ ບ້ານ ທ່າພະ, ບ້ານ ນາແຫວ່ງ, ເມືອງ ຍົມມະລາດ ແລະ ເມືອງໜອງບົກ ພ້ອມໄດ້ມອບເຄື່ອງຊ່ວຍເຫຼືອປະກອບມີ: ນໍ້າດື່ມ, ອາຫານແຫ້ງລວມມູນຄ່າທັງໝົດ 17 ລ້ານກວ່າກີບ ເພື່ອບັນເທົ່າທຸກໃຫ້ແກ່ຜູ້ປະສົບໄພພິບັດທາງທໍາມະຊາດໃນຄັ້ງນີ້.

ຜ່ານການລົງຕິດຕາມເບີ່ງສະພາບພື້ນທີ່ຖືກຜົນກະທົບຕົວຈິງແລ້ວ ຕອນເຊົ້າວັນທີ31 ກໍລະກົດ 2018.ທ່ານລັດຖະ ມົນຕີ ກະຊວງກະສິກໍາ ແລະ ປ່າໄມ້ ໄດ້ໃຫ້ທິດຊີ້ນໍາໂດຍເນັ້ນໃສ່ຫຼາຍບັນຫາດັ່ງນີ້: (1) ເອົາໃຈໃສ່ຄຸ້ມຄອງປົກປັກຮັກສາພື້ນທີ່ຜະລິດເຂົ້າ, ພືດທີ່ນໍ້າບໍ່ຖ້ວມ ແລະ ບ່ອນທີ່ຖ້ວມແຕ່ບໍ່ເສຍຫາຍຫຼາຍໃຫ້ດີ ໂດຍມອບໃຫ້ທຸກຂະແໜງການທີ່ກ່ຽວຂ້ອງທ້ອງຖີ່ນເປັນເຈົ້າການ.(2)ກະກຽມການປ້ອງກັນສັດຕູພືດ, ພະຍາດພືດ ແລະ ພະຍາດສັດ ທີ່ຈະເກີດຂຶ້ນຫຼັງນໍ້າຫຼຸດລົງ ພ້ອມໃຫ້ພະນັກງານລົງຕິດຕາມນໍາພາປະຊາຊົນຫາວິທີແກ້ໄຂດ້ານຜົນເສຍ ການຜະລິດເຂົ້ານາແຊງ ແລະ ພືດລະດູຝົນ.(3) ລົງຕິດຕາມສະພາບເກັບກໍາຂໍ້ມູນນໍ້າ, ຂໍ້ມູນນໍ້າຝົນ, ຜົນເສຍຫາຍດ້ານຊົນລະປະທານ ແລະ ຜົນກະທົບຈາກການປ່ອຍນໍ້າຂອງເຂື່ອນ.(4) ກວດກາຄືນດ້ານແນວພັນເຂົ້າ, ແນວພັນພືດ ເພື່ອເຮັດການຜະລິດທົດແທນຄືນ ຫຼັງຈາກນໍ້າຫຼຸດລົງເຂົ້າສູ້ສະພາບປົກກະຕິ.