DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

ຄະນະນຳກົມປູກຝັງ ຕິດຕາມ ທ່ານ ລັດຖະມົນຕີ ກະຊວງກະສິກໍາ ແລະ ປ່າໄມ້ ລົງເຮັດວຽກຢູ່ເຂດໄພນ້ຳຖ້ວມ ແຂວງສະຫວັນນະເຂດ

ໃນຕອນບ່າຍ ຂອງວັນທີ 31 ກໍລະກົດ 2018 ທີ່​ຜ່ານ​ມາ ທ່ານ ວິໄລສຸກ ເຄນນະວົງ ຫົວໜ້າກົມປູກຝັງ ໄດ້ເຂົ້າກອງປະຊຸມລາຍງານສະພາບໄພພິບັດນໍ້າຖ້ວມ ທີ່ຫ້ອງປະຊຸມພະແນກກະສິກໍາ ແລະ ປ່າໄມ້ແຂວງສະຫວັນນະເຂດ. ​​ເຊິ່ງມີ ຫົວໜ້າພະແນກກະສິກໍາ ແລະ ປ່າໄມ້ແຂວງ, ຫົວໜ້າກົມ-ຮອງກົມ ທີ່ກ່ຽວຂ້ອງຈາກກະຊວງກະສິກໍາ ແລະປ່າໄມ້ ພ້ອມດ້ວຍພະນັກງານອ້ອມຂ້າງພະແນກກະສິກໍາ ແລະປ່າໄມ້ແຂວງເຂົ້າຮ່ວມ. ໃຫ້ກຽດເປັນປະທານໂດຍ ທ່ານ ປອ. ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະປ່າໄມ້. ຈຸດປະສົງ​ແມ່ນ​ເພື່ອ​ຮັບ​ຟັງ​ລາຍ​ງານ​ສະພາບ​ຜົນ​ກະທົບ​ຂອງ​ນ້ຳ​ຖ້ວມ​ຕໍ່​ການ​ຜະລິດ​ກະສິກຳ ​ແລະ ມາດ​ຕະການ​ແກ້​ໄຂ​ສະ​ເພາະ​ໜ້າ ​ແລະ ​ໄລຍະ​ຍາວ

​ໃນ​ທີ່​ກອງ​ປະຊຸມ​ໄດ້​ຮັບ​ຟັງ​ການ​ລາຍ​ງານ​ຂໍ້​ມູນ​ເບື້ອງ​ຕົ້ນ ຈາກ ທ່ານ ຄໍາລຸຍ ຍາດຕິວົງ ຫົວໜ້າພະແນກກະສິກໍາ ແລະປ່າໄມ້ ແຂວງສະຫວັນນະເຂດ ໄດ້ລາຍງານໃຫ້ຮູ້ວ່າ: ທົ່ວແຂວງມີແຜນປູກເຂົ້າລະດູຝົນ 2018 ໃນເນື້ອທີ່ 207.000 ເຮັກຕາ, ຄາດໝາຍຜົນຜະລິດໃຫ້ໄດ້ 870.720 ໂຕນ ດ້ວຍສະມັດຕະພາບ 4,21 ໂຕນ/ເຮັກຕາ, ປູກພືດລະດູຝົນ 41.500 ຮຕ. ມາຮອດປັດຈຸບັນ, ປັກດໍາໄດ້ແລ້ວ 196.274 ຮຕ ເທົ່າກັບ 95% ແລະປູກພືດລະດູຝົນໄດ້ 23.510 ເຮັກຕາ ເທົ່າກັບ 56% ເນື່ອງຈາກຝົນໄດ້ສືບຕໍ່ຕົກຕິດຕໍ່ກັນຢ່າງຕໍ່ເນື່ອງຈາກພະຍຸເຊີນເຕີນ ຈື່ງເຮັດໃຫ້ມີນໍ້າຖ້ວມ 12 ເມືອງ, 321 ບ້ານ ມີ 18.942 ຄອບຄົວ ມີເນື້ອທີ່ນາຖືກນໍ້າຖ້ວມຮອດວັນທີ 31 ກໍລະກົດ 2018 ຈໍານວນ 27.500 ກວ່າເຮັກຕາ ເທົ່າກັບ 13,6% ຂອງເນື້ອທີ່ປັກດໍາ 196.274 ຮຕ. ເມືອງທີ່ໄດ້ຮັບຜົນກະທົບຫຼາຍກວ່າໝູ່ຄື: ເມືອງຈໍາພອນ, ຊົນນະບູລີ, ໄຊບູລີ ແລະເມືອງສອງຄອນ. ນອກຈາກນັ້ນ ຍັງມີງົວ ແລະສັດປີກຕາຍຈໍານວນໜຶ່ງ, ມີໜອງປາ 208 ໜອງ ແລະ ແນວພັນປາພໍ່ແມ່ພັນຖືກເສຍຫາຍ.

​ໃນ​ທີ່​ກອງ​ປະຊຸມ​ຄັ້ງ​ນີ້ ທ່ານ ລັດຖະມົນຕີ ກະຊວງກະສິກໍາ ແລະປ່າໄມ້ ໄດ້ໃຫ້ກຽດໂອ້ລົມຊີ້ນໍາຕໍ່ກອງປະຊຸມຄື: 1) ໃຫ້ພະແນກກະສິກໍາ ແລະປ່າໄມ້ ແຂວງເອົາໃຈໃສ່ຊຸກຍູ້ຊ່ວຍເຫຼືອບັນດາເມືອງທີ່ຖືກຜົນກະທົບຢ່າງໃກ້ສິດຕິດແທດ. 2) ພາຍຫຼັງນໍ້າຫຼຸດລົງ ໃຫ້ເກັບກໍາຂໍ້ມູນຢ່າງລະອຽດເພື່ອເປັນຂໍ້ມູນໃນການຈັດການບໍລິຫານນໍ້າ ແລະ ວາງແຜນການກະກຽມໃນຕໍ່ໜ້າໃຫ້ຖືກຕ້ອງ. 3) ລົງເກັບກໍາຂໍ້ມູນດ້ານແນວພັນເຂົ້າ, ແນວພັນພືດ ແລະ ປັດໃຈການຜະລິດຕ່າງໆ ເພື່ອສະໜອງໃຫ້ຊາວກະສິກອນເຮັດການຜະລິດທົດແທນຄືນໃນເຂດທີ່ຖືກເສຍຫາຍຕາມເງື່ອນໄຂ ສະພາບຕົວຈິງ. 4) ໃຫ້ກະກຽມການລະບາດຂອງສັດຕູພືດ, ພະຍາດພືດ ແລະ ພະຍາດສັດ ທີ່ຈະເກີດຂື້ນ ພ້ອມທັງ, ຄົ້ນຄວ້າແກ້ໄຂອາຫານໃຫ້ສັດລ້ຽງກິນ ພາຍຫຼັງນໍ້າຫຼຸດລົງ ທັງໝົດ ນັ້ນແມ່ນເປັນການປ້ອງກັັນການລະບາດສັດຕູພືດ ທີ່ຈະເກີດຂື້ນຕໍ່ສະພາບກາານຜະລິດກະສິກໍາກັບຄືນສູ້ສະພາບປົກກະຕິໂດຍໄວ້.

ເພື່ອແກ້ໄຂສະພາບທີ່ເສຍຫາຍດັ່ງກ່າວ ໃນເບື້ອງຕົ້ນ ທ່ານ ປອ.ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະປ່າໄມ້ ໄດ້ໃຫ້ກຽດມອບເງິນຊ່ວຍເຫຼືອໃຫ້ພະແນກກະສິກໍາ ແລະ ປ່າໄມ້ແຂວງສະຫວັນນະເຂດ ຈໍານວນ 50 ລ້ານກີບ. ຈາກນັ້ນ, ໄດ້ລົງໄປມອບເຄື່ອງຊ່ວຍເຫຼືອໃຫ້ພໍ່ແມ່ປະຊາຊົນຜູ້ທີ່ຖືກຜົນກະທົບຢູ່ເມືອງ ໄຊບູລີ ແລະ ເມືອງສອງຄອນ ປະກອບມີ: ນໍ້າດື່ມ, ອາຫານແຫ້ງລວມມູນຄ່າທັງໝົດ 11 ລ້ານກວ່າກີບ ເພື່ອເປັນການບັນເທົາທຸກໃຫ້ແກ່ຜູ້ປະສົບໄພພິບັດທາງທໍາມະຊາດໃນຄັ້ງນີ້.