DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

ໂຄງການຊີວະນາໆພັນຍູ້ການສົ່ງອອກຊາແຫ້ງໄດ້ 18 ໂຕນ

  • Written by Linglong

ໃນວັນທີ 11 ກໍລະກົດ 2019 ກົມປູກຝັງ, ກະຊວງກະສິກຳ ແລະ ປ່າໄມ້ ຈັດກອງປະຊຸມຄະນະຊີ້ນຳໂຄງການສົ່ງເສີມສິນຄ້າຊີວະນາໆພັນ ຂື້ນທີ່ສູນຝຶກອົບຮົມແມ່ຍິງລາວ, ສູນກາງສະຫະພັນແມ່ຍິງລາວ ທີ່ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ວຽງສະໄຫວ ແສງສຸລິວົງ ຫົວໜ້າພະແນກມາດຕະຖານ, ກົມປູກຝັງ ກະຊວງກະສິກຳ ແລະ ປ່າໄມ້, ມີ ທ່ານ ບົງ ໝື່ນໄຊຍະພົມ ຮອງຫົວໜ້າອົງການຮ່ວມມືສາກົນແຫ່ງປະເທດສະວິດ ປະຈຳລາວ ( Helvetas ), ມີບັນດາຄະນະຊີ້ນຳໂຄງການດັ່ງກ່າວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ວຽງສະໄຫວ ແສງສຸລິວົງ ກ່າວວ່າ: ໂຄງການສົ່ງເສີມສິນຄ້າຊີວະນາໆພັນ ( Biotrade ) ຢູ່ ສປປ ລາວ ໄດ້ຮັບການອະນຸມັດໃນເດືອນພະຈິກ 2018 ຈຸດປະສົງຫຼັກຂອງໂຄງການແມ່ນເພື່ອປະກອບສ່ວນພັດທະນາຂະແໜງການຊາ ແລະ ຜະລິດຕະພັນຊາ ໃຫ້ສາມາດເຂົ້າເຖິງຕະຫຼາດສົ່ງອອກທີ່ມີຄຸນຄ່າສູງ. ນອກຈາກນີ້, ກໍມີບັນດາຜະລິດຕະພັນ ເຊິ່ງເຫັນໄດ້ວ່າໂຄງການດັ່ງກ່າວມີຄວາມສຳຄັນໃນການປະກອບສ່ວນພັດທະນາກະສິກຳຢູ່ລາວເຮົາ ໂດຍສະເພາະແມ່ນການຜະລິດກະສິກຳເປັນສິນຄ້າເພື່ອສົ່ງອອກ. ເຖິງຢ່າງໃດກໍຕາມ, ປັດຈຸບັນວຽກງານຜະລິດກະສິກຳ ເປັນຕົ້ນແມ່ນການຜະລິດສະບຽງອາຫານ ແລະ ຜະລິດກະສິກຳເປັນສິນຄ້າ ກຳລັງໄດ້ຮັບການຈັດຕັ້ງປະຕິບັດ ແລະ ພັດທະນາຢ່າງຕໍ່ເນື່ອງເຮັດໃຫ້ມີຜະລິດຕະພັນທີ່ຫຼາກຫຼາຍເພີ່ມຂື້ນ ທັງດ້ານປະລິມານ ແລະ ຄຸນນະພາບ ສາມາດຕອບສະໜອງໄດ້ໂດຍພື້ນຖານແກ້ໄຂຄວາມຕ້ອງການພາຍໃນ ໂດຍສະເພາະແມ່ນເຂົ້າ ເຊິ່ງສາມາດສົ່ງອອກໄປຕ່າງປະເທດໄດ້ອີກດ້ວຍ. ພ້ອມທັງນີ້, ກໍຍັງມີກ້ວຍ, ອ້ອຍ ແລະ ພືດຜັກຈຳນວນໜຶ່ງ.

ທ່ານ ນາງ ນິພາພອນ ນາມປັນຍາ ຫົວໜ້າໂຄງການສົ່ງເສີມສິນຄ້າຊີວະນາໆພັນ ປະຈຳລາວ ຂື້ນລາຍງານກ່ຽວກັບການຈັດຕັ້ງປະຕິບັດວຽກງານ 6 ເດືອນຕົ້ນປີ 2019 ຕໍ່ກອງປະຊຸມໂດຍມີເນື້ອໃນວ່າ: ຈຸດປະສົງຂອງການຈັດກອງປະຊຸມຄັ້ງນີ້ກໍເພື່ອລາຍງານຄວາມຄືບໜ້າຂອງການຈັດຕັ້ງປະຕິບັດໂຄງການ ປະຈຳ 6 ເດືອນຕົ້ນປີ ໂດຍລວມໃນໄລຍະຜ່ານມາ ໂຄງການກໍ່ມີຫຼາຍວຽກທີ່ພົ້ນເດັ່ນ ເປັນຕົ້ນແມ່ນການພັດທະນາຕ່ອງໂສ້ງມູນຄ່າ ເຊິ່ງມີປະຊາຊົນເມືອງຜົ້ງສາລີ ແຂວງຜົ້ງສາລີ ເຂົ້າຮ່ວມຕ່ອງໂສ້ການຜະລິຊາ ຈຳນວນ 547 ຄອບຄົວ; ມີບໍລິສັດຜູ້ສົ່ງອອກເຂົ້າຮ່ວມນຳ 4 ຕ່ອງໂສ້ 8 ບໍລິສັດຄືຜະລິດຊາຢູ່ ແຂວງຜົ້ງສາລີ ແລະ ແຂວງບໍ່ແກ້ວ, ໝາກແຄ່ນ ຢູ່ແຂວງຫົວພັນ, ແຂວງຊຽງຂວາງ, ແຂວງວຽງຈັນ ແລະ ເຂດໃຕ້, ຍານ ຢູ່ແຂວງຫຼວງພະບາງ ແລະ ຫົວພັນ, ໝາກແໜ່ງຢູ່ແຂວງຜົ້ງສາລີ, %ຍກງານສົ່ງເສີມການເຂົ້າເຖິງຕະຫຼາດ ມີຕະຫຼາດຕ່າງປະເທດທີ່ຕົກລົງຊື້ - ຂາຍສິນຄ້າທີ່ເປັນທ່າແຮງ ເຊັ່ນ: ສາມາດສົ່ງອອກຊາແຫ້ງໄດ້ 18,2 ໂຕນ ມູນຄ່າ 139.600 ໂດລາສະຫະລັດ ໄປຕະຫຼາດເຢຍລະມັນ ແລະ ສະວິດ,ໝາກແຄ່ນ ຈຳນວນ 500 ກິໂລກຣາມ ໄປຕະຫຼາດ ຝລັ່ງ ແລະ ມຽນມາ.

ດ້ານວຽກງານມາດຕະຖານ ແລະ ການຢັ້ງຢືນ ອັນພົ້ນເດັ່ນແມ່ນສາມາດສະໜັບສະໜູນໃຫ້ 2 ບໍລິສັດຊາຢູ່ແຂວງຜົ້ງສາລີ ປະຕິບັດມາດຕະຖານກະສິກຳອິນຊີ ແລະ ການຄ້າເປັນທຳສາກົນ;  ວຽກງານການເຂົ້າຫາແຫຼ່ງທຶນ ສາມາອຳນວຍຄວາມສະດວກໃຫ້ 2 ບໍລິສັດທີ່ກ່າວມາຂ້າງເທິງພັດທະນາແຜນທຸລະກິດໂດຍສະເພາະນະໂຍບາຍດອກເບ້ຍຕ່ຳ ເຊິ່ງຍັງລໍຖ້າຮັບອະນຸມັດຢູ່; ສຸດທ້າຍວຽກງານດ້ານນະໂຍບາຍ ສາມາດກຳນົດບັນຫານບຸລິມະສິດ ແລະ ຂັ້ນຕອນໃນການແກ້ໄຂກ່ຽວກັບການສົ່ງອອກສິນຄ້າສູ່ຕະຫຼາດສາກົນ ແລະ ຊາຍແດນ ໂດຍສະເພາະການສົ່ງອອກຊາແຫ້ງ ແລະ ອື່ນໆ, ເວົ້າລວມແລ້ວໂຄງການສົ່ງເສີມການຄ້າຊີວະນາໆພັນແມ່ນແນ່ໃສ່ການສົ່ງເສີມພືດທີ່ມີທ່າແຮງ ໂດຍສະເພາະແມ່ນຊາຢູ່ແຂວງ ຜົ້ງສາລີ ທ່ານ ນາງ ນິພາພອນ ກ່າວ