DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

ເຮັດໄດ້ແທ້..!!! ປະຊາຊົນບ້ານໜອງເຂັງ ປູກໝາກເຜັດສ້າງລາຍຮັບເຂົ້າຄອບຄົວ

ບ້ານ​ໜອງ​ເຂັງ ເມືອງ​ໄຊ​ທານີ ນະຄອນຫຼວງ​ວຽງ​ຈັນ ເປັນ​ບ້ານ​ໜຶ່ງ​ທີ່​ຕິດ​ກັບ​ແຄມ​ນ້ຳງື່ມ ອຸດົມ​ສົມບູນ​ໄປ​ດ້ວຍ​ການ​ເຮັດ​ກະສິກຳ​ປູກຝັງ ເຊິ່ງ​ຈາກ​ການ​ລາຍ​ງານ​ຂອງ​ນາຍ­ບ້ານ​ໜອງ​ເຂັງ​ໃຫ້​ຮູ້​ວ່າ: ປະຊາຊົນ​ພາຍ​ໃນ​ບ້ານ​ຈຳນວນ 50 ກວ່າ​ຄອບຄົວ ເຮັດ​ອາຊີບ​ປູກ​ໝາກເຜັດ​ເປັນ​ສິນຄ້າ ໃນ​ນີ້ ຄອບຄົວ​ທີ່​ໄປ​ເຊົ່າ​ດິນ​ຢູ່​ບ້ານ​ອື່ນ​ປະມານ 30 ຄອບຄົວ ປູກຝັງ​ເປັນ​ດິນ​ຂອງ​ຕົນ​ເອງ​ຢູ່​ພາຍ​ໃນ​ບ້ານ​ປະມານ 20 ຄອບຄົວ ລວມ​ເນື້ອທີ່​ປູກ​ໝາກເຜັດ​ທັງ​ໝົດ ປະມານ 50 ເຮັກຕາ ອາທິດ​ໜຶ່ງ​ເກັບ​ກູ້​ໝາກເຜັດ​ໄດ້​ທັງ​ໝົດ 6 ໂຕນ ໃນ​ລາຄາ​ແມ່​ຄ້າ​ເກັບ​ຊື້ 240.000 ກີບ​ຕໍ່​ໜຶ່ງ​ໝື່ນ.

ນາງ ຈັນ ພູ​ຫອມ ອາຍຸ 50 ປີ ແມ່ນ​ຄອບຄົວ​ໜຶ່ງ​ທີ່​ໄດ້​ເລີ່ມ​ປູກ​ໝາກເຜັດ​ເປັນ​ປີ​ທຳ​ອິດ ໄດ້​ກ່າວ​ວ່າ: ເຫັນ​ຄອບຄົວ​ອື່ນ​ເຮັດ​ອາຊີບ​ນີ້​ສາມາດ​ສ້າງ​ລາຍ​ຮັບ​ເຂົ້າ​ຄອບຄົວ​ມີ​ຢູ່​ມີ​ກິນ ຈິ່ງ​ຕັດ​ສີນ​ໃຈ​ພາ​ຄອບຄົວ​ລົງມື​ປູກ​ໝາກເຜັດ ໂດຍ​ໃຊ້​ຕົ້ນ​ທຶນ 20 ລ້ານ​ກີບ ມີ​ເນື້ອທີ່​ຜະລິດ 4.800 ຕາ​ແມັດ ມາ​ຮອດ​ປັດຈຸບັນ​ແມ່ນ​ໄດ້​ເກັບ​ກູ້​ໝາກເຜັດ​ໄປ​ແລ້ວ 3 ເທື່ອ ໂດຍ​ຈະ​ເກັບ​ຢູ່​ອາທິດ​ລະ​ເທື່ອ ເກັບ​ໄດ້​ເທື່ອ​ລະ 300 ກິ​ໂລ ສາມາດ​ສ້າງ​ລາຍ​ຮັບ​ອາທິດ​ລະ 6 ລ້ານ​ກວ່າ​ກີບ ແລະ ຄາດ​ວ່າ​ຈະ​ໄດ້​ເກັບ​ກູ້​ອີກ​ຈົນ​ຮອດ​ທ້າຍ​ເດືອນ​ເມສາ ຈິ່ງ​ໝົດ​ລະດູ

 

ທີ່ມາ: ນສພ ວຽງຈັນໃໝ່