DOA

ປູກຝັງທັນສະໄໝ ສະອາດ ປອດໄພ ໃສ່ໃຈຄຸນນະພາບ ໜັ້ນຄົງ ຍືນຍົງ ເປັນສິນຄ້າ

  • PDF

ສາເຫດການປັກດຳເຂົ້ານາແຊງ ສົກປີ 2011-2012 ບໍ່ໄດ້ຕາມແຜນ

ກົມ​ປູກຝັງ​ໄດ້​ສ້າງແຜນການປູກນາແຊງ ສົກປີ 2011-2012: ແມ່ນມີ​ເນື້ອ​ທີ່ 135,000 ເຮັກຕາ, ຜະລິດຕະພາບ 4.90 ໂຕນ/ເຮັກຕາ, ຜົນຜະລິດ 660,900 ໂຕນ. (ໂດຍອີງໃສ່ພື້ນຖານຂໍ້ມູນຈາກກົມ ຊົນລະປະທານ ທີ່ກຳນົດ ໄວ້ວ່າຈະສາມາດສະໜອງນ້ຳຊົນລະປະທານປະມານ 135,000 ເຮັກຕາ). ແລະ ແຜນການປູກພືດ ລະດູແລ້ງຕ່າງໆ ແມ່ນ 134,250 ເຮັກຕາ.

  1. ການ​ປູກ​ເຂົ້າ

ຜ່ານ​ການຈັດ​ຕັ້ງ​ປະຕິບັດ​ຕົວ​ຈິງ ​ໂດຍ​ອິງ​ໃສ່​ຂໍ້​ມູນ​ລາຍ​ງານ​ຈາກ​ບັນດາ​ແຂວງ ສາມາດ​ສັງ​ລວມ​ເບື້ອງ​ຕົ້ນ​​ໄດ້​ວ່າ: ບັນດາແຂວງຕ່າງໆ ກໍ່ໄດ້ກະກຽມ ສະຫຼູບຂາດຕົວ ຕົວເລກ​ເນື້ອ​ທີ່ປັກດຳ ເຂົ້ານາແຊງ, ພ້ອມທັງຂຸ້ນຂ້ຽວບົວລະບັດຮັກສາເຂົ້ານາແຊງ ຕາມແຈ້ງການຂອງ ກົມປູກຝັງ ສະບັບເລກທີ 0386/12/3/2012 ກ່ຽວກັບສະຫຼູບຂາດຕົວ​ເນື້ອ​ທີ່ການປັກດຳເຂົ້ານາແຊງ ແລະ ພືດລະດູແລ້ງ ພ້ອມທັງຄາດຄະເນເບື້ອງຕົ້ນຜົນຜະລິດລະດູແລ້ງ ສົກປີ 2011-2012, ຜ່ານການ ຕິດຕາມ ແລະ ສັງລວມຂໍ້ມູນການຜະລິດໃນເບື້ອງຕົ້ນ ຈະ​ມີເນື້ອທີ່ປັກດຳ​ໄດ້ທັງໝົດປະມານ 109,374 ເຮັກຕາ ຜົນຜະລິດ ປະມານ 533,930 ໂຕນ. ຫຼື ເທົ່າກັບ 81 % ຂອງເນື້ອທີ່ແຜນ ການທີ່ວາງໄວ້. ຫຼຸດແຜນການ ທີ່​​ໄດ້ກຳນົດ​ໄວ້ 18.98 % ຫຼື ປະມານ 25,626 ​ເຮັກຕາ ​ແລະ​ສົມ​ທຽບ​ໃສ່ ສະພ​າບການ​ຜະລິດ​​ເຂົ້ານາ​ແຊງ ​ໃນ​ສົກ​ປີ ຜ່ານ​ມາ (2010-2011) ​ເຫັນ​ວ່າ​ຍັງ​ຫຼຸດ 2,626 ​ເຮັກຕາ.

  1. ການປູກພືດລະດູແລ້ງຕ່າງໆ :

ການ​ປູກ​ພືດ​ລະ​ດູ​ແລ້ງ​ກໍ​ເປັນ​ຂະ​ບວນຟົດ​ຟື້ນ​ດີ​ສົມ​ຄວນ ທັງ​ນີ້​ ກໍ່​ເພື່ອ​​ ເປັນ​ການ​ທົດ​ແທນ​ການ​ປູກ​ເຂົ້າ ໃນ​ເຂດ​ທີ່​ມີ​ນ້ຳ​ບໍ່​ພຽງ​ພໍຮັບ​ໃຊ້​ການ​ຜະ​ລິດ. ເນື້ອ​ທີ່​ປູກ​ພືດລະ​ດູ​ແລ້ງ ມາຮອດປະຈຸບັນສາມາດ ປະ​ຕິ​ບັດ​ໄດ້ແລ້ວ 121,000 ເຮັກຕາ (ຂໍ້​ມູນ​ດັ່ງກ່າວ​ນີ້ ບໍ່ທັນໄດ້ສະຫຼູບຂາດຕົວເທື່ອ) ຫຼື​ ໄດ້ປະມານ 90 % ຂອງເນື້ອທີ່ແຜນການ. ເນື່ອງຈາກວ່າ ການລາຍງານຈາກບັນດາແຂວງ ແມ່ນຍັງບໍ່​ທັນ​ເປັນ​ເອກະ​ພາບ​ເທື່ອ ຊື່​ງຄາດ​ວ່າ​ຈະ​ສາມາດ​ປູກໄດ້​​ໃນ​ທ້າຍ​ລະດູ​ແລ້ງ​ນີ້ປະມານ 135,000 ​ເຮັກຕາ ໃນ​ນັ້ນ ພືດ​ທີ່​ສຳ​ຄັນ ປະ​ກອບ​ມີ:

-        ສາ​ລີ​ແຂງ ປູກ​ໄດ້ 14,900 ເຮັກ​ຕາ ປູກ​ຫລາຍ​ຢູ່ ​ແຂວງ ບໍ່​ແກ້ວ, ອຸດົມໄຊ ແລະ ແຂວງວຽງຈັນ.

-        ສາ​ລີ​ຫວານ ປູກໄດ້ 7,466 ເຮັກ​ຕາ ສ່ວນຫຼາຍ​ແມ່ນເຂດ ​ພາກກາງ ​ແລະ ​ພາກໃຕ້.

-        ຖົ່ວເຫຼືອງ ປູກໄດ້ 2,867 ເຮັກ​ຕາ.

-        ຖົ່ວຂຽວ ປູກໄດ້ 1,183 ເຮັກ​ຕາ

-        ຖົ່ວດີນ ປູກໄດ້ 6,007 ເຮັກ​ຕາ

-        ຖົ່ວດຳ ແລະ ຖົ່ວແດງ ປູກໄດ້ 2,874 ເຮັກຕາ

-        ຢາ​ສູບ ປູກໄດ້ 4,330 ເຮັກ​ຕາ.

-        ສຳ​ລັບ​ພືດ​ຜັກ​ຕ່າງໆ ແມ່ນ​ປູກ​ຫຼາຍ​ໃນທຸກ​ພື້ນ​ທີ່​ທຳ​ການ​ຜະ​ລິດ ເຊິ່ງສາ​ມາດ​ສະ​ໜອງ​ໃຫ້​ຕະ​ຫຼາດ​ຮັບ​ໃຊ້​ການ​ບໍ​ລິ​ໂພກ ພາຍ​ໃນ​​ໄດ້​​ຢ່າງ​ພຽງ​ພໍ ແລະ​ ລາ​ຄາ​ຖືກ ເປັນ​ຕົ້ນ​ແມ່ນ​ປະ​ເພດ​ຜັກ​ກິນ​ໃບ ແລະ ຜັກ​ກິນໝາກ​ຕ່າງໆ ມີ​ເນື້ອ​ທີ່​ປະ​ມານ  55,558 ເຮັກ​ຕາ.

-        ນອກ​ຈາກ​ນັ້ນ ຍັງ​ມີ​ການ​ປູກ ໝາກໄມ້ຕ່າງໆ ຊື່ງ​ມີ​ຢູ່​ທົ່ວໆ​ໄປ ພື້ນ​ທີ່​ປູກ​ຫຼາຍ​ແມ່ນ ເຂດ​ພາກ​ກາງ ປະ​ມານ 7,736 ເຮັກ​ຕາ.

  1. I. ສາ​ເຫດ​ທີ່​ພາ​ໃຫ້ເນື້ອ​ທີ່​ການ​ຜະ​ລິດ​ພືດ​ລະ​ດູ​ແລ້ງ ບໍ່​ໄດ້​ຕາມ​ແຜນ​ການ:
    1. ການສະໜອງສົ່ງ​ນ້ຳ​ຊົນ​ລະ​ປະ​ທານ​ ເພື່ອ​ຮັບ​ໃຊ້​ການ​ຜະ​ລິດ​ນາ​ແຊງ ບໍ່​ສາ​ມາດ​ຕອບ​ສະໜອງ​ໄດ້​ຕາມ​ຄວາມຕ້ອງ​ການ​ຢູ່​ບາງ​ພື້ນ​ທີ່ ອັນ​ເນື່ອງ​ມາ​ຈາກ​ຫຼາຍ​ສາ​ເຫດ ເຊັ່ນ: ການ​ກໍ່​ສ້າງ​ ແລະ ສ້ອມແປງ​ຄອງ​ສົ່ງ​ນ້ຳ ບໍ່​ທັນ​ຕາມ​ກຳ​ນົດ​ເວ​ລາ, ການ​ອະ​ນຸ​ມັດ​ງົບ​ປະ​ມານ​ຮັບ​ໃຊ້ຍັງ​ຊ້າ​.
    2. ການກຳນົດໂຄງປະກອບ ການຜະລິດຍັງບໍ່ທັນແທດເໝາະ ກັບເຂດແຄນ ເຂົ້າ​ສູ່​ການ​ຜະ​ລິດ ຍັງ​ບໍ່​ມີ​ປະ​ສິດ​ທິ​ຜົນ​ສູງ, ລາຍ​ຮັບ​ທີ່​ໄດ້​ຈາກ​ການ​ຜະ​ລິດ​ຍັງ​ຂ້ອນຂ້າງ​ຕ່ຳ, ດິນ​ເປົ່າ​ຫວ່າງ​ບໍ່​ໄດ້​ເຮັດ​ການ​ຜະ​ລິດ​ຍັງ​ມີ​ຫຼາຍ, ການ​ວາງ​ແຜນ​ການ​ນຳ​ໃຊ້​ທີ່​ດີນ ໃຫ້​ຖືກ​ກັບ​​ຄ​ວາມ​ເປັນ​ຈິງຂອງສະ​ພາບ​ເສດ​ຖະ​ກິດ​-​ສັງ​ຄົມ ຍັງ​ບໍ່​ມີ​ອັນ​ລະ​ອຽດ, ປະ​ກົດ​ການ​ຖົມ​ທີ່​ດີນ​ກະ​ສິ​ກຳ ໄປ​ນຳ​ໃຊ້​ເຂົ້າ​ໃນ​ເປົ້າ​ໝາຍ​ອື່ນ ເຊັ່ນ : ການ​ກໍ່​ສ້າງ​ອາ​ຄານ ເຮືອນ​ຊານ ອ້ອມ​ແອ້ມ​ຕົວ​ເມືອງໃຫຍ່ ແມ່ນ​ຍັງ​ແພ່​ຫຼາຍ ແລະ ຍັງ​ບໍ່​ທັນ​ມີ​ມາດ​ຕະ​ການ​ເພື່ອ​ແກ້​ໄຂ ທີ່​ເດັດ​ຂາດ​ໄດ້.
    3. ເນື່ອງ​ຈາກວ່າ ການ​ລົງ​ທືນ​ປູກ​ເຂົ້າ​ນາ​ແຊງ​ຂ້ອນ​ຂ້າງ​ສູງ ມູນຄ່າເພີ່ມຂອງຜົນຜະລິດຕໍ່າ, ດັ່ງ​ນັ້ນ ຊາວ​ກະ​ສິ​ກອນ​ໃນຫຼາຍທ້ອງ​ຖີ່ນ ຈື່ງ​ຫັນ​ໄປ​ປູກ​ພືດ​ທີ່ມີເສດ​ຖະ​ກິດ​ສູງກວ່າ ແລະ ທີ່​ມີ​ຮອບ​ໝູນ ໄວ​ກວ່າ ເຊັ່ນ: ການ​ປູກ​ຢາ​ສູບ, ຖົ່ວ​ເຫຼືອງ, ໝາກ​ໂມ, ແລະ ພືດ​ຜັກ​ຕ່າງໆ.
    4. ກົນໄກການຄຸ້ມຄອງ ​ປັດ​ໃຈ​ຂາເຂົ້າ​ກະ​ສິ​ກຳ ປະ​ເພດ​ຕ່າງໆ ແມ່ນ​ຍັງ​ຈຳ​ກັດ, ລາ​ຄາ​ກໍ່​ແພງ ແລະ ສ່ວນ​ໃຫຍ່​ແມ່ນ​ນຳ​ເຂົ້າ ເຊັ່ນ : ຝຸ່ນ, ຢາ, ແນວ​ພັນ.
    5. ການ​ປະສານ​ງານ ລະຫວ່າງ​ກົມ​ກອງ​ໃນ​ລະດັບ​ມະຫາ​ພາກ ​ແລະ ​ໃນ​ລະດັບ​ທ້ອງ​ຖິ່ນ​ແມ່ນ​ຍັງ​ບໍ່​ກົມ​ກຽວ ​ເທົ່າ​ທີ​ຄວນ,
    6. ຕົ້ນທືນການຜະລິດສູງຍ້ອນມີການຫັນປ່ຽນແຮງງານກະສິກຳ ໄປຫາພາກອຸດສະຫະກຳ ແລະ ການບໍລິຫານ ທີ່ໄດ້ລາຍຮັບສູງກວ່າ ພ້ອມດຽວກັນນັ້ນ ການນຳໃຊ້ກົນຈັກທົດແທນແຮງງານຂອງຂະແໜງ ການກະສິກຳຍັງຕໍ່າ