ບ້ານດອນມະໄຫຼ ຖືກເອົາການຜະລິດສິນຄ້າເປັນທ່າແຮງຊຸກຍູ້ເສດຖະກິດ

ບ້ານດອນມະໄຫຼ ຕັ້ງຢູ່ທາງທິດໃຕ້ຂອງເມືອງທ່າແຂກ ແຂວງຄຳມ່ວນ ຫ່າງຈາກເທດສະບານເມືອງ 8 ກິໂລແມັດ, ພາຍໃນບ້ານປະກອບມີ 152 ຄອບຄົວ, ພົນລະເມືອງ 884ຄົນ, ອາຊີບຕົ້ນຕໍແມ່ນເຮັດນາ, ປູກຝັງ-ລ້ຽງສັດເປັນອາຊີບສຳຮອງ, ມີເນື້ອທີ່ທັງໝົດ 300 ກ່ວາເຮັກຕາ ແລະ ເນື້ອທີ່ປູກພືດລະດູແລ້ງ 58 ເຮັກຕາ.

ທ່ານຄຳຟອງ ອາລຸນສະຫວັດ ນາຍບ້ານໆດອນມະໄຫຼໃຫ້ສຳພາດຕໍ່ສື່ມ່ວນຊົນທ້ອງຖິ່ນວ່າ: ເພື່ອປະຕິບັດຕາມແນວທາງນະໂຍບາຍຂອງພັກ-ລັດ ກໍ່ຄືການຜະລິດເປັນສິນຄ້າແກ້ໄຂຄວາມທຸກຍາກແມ່ນໜ້າທີ່ຂອງໝົດທຸກຄົນທີ່ຈະຕ້ອງໄດ້ເອົາໃຈສ່ສ້າງເສດຖະກິດຄອບຄົວໃຫ້ຊີວິດການເປັນຢູ່ດີຂື້ນໂດຍພັກ-ລັດຖະບານໄດ້ມີການສົ່ງເສີມໃຫ້ພໍ່ແມ່ປະຊາຊົນໃນການນຳໃຊ້ເຕັກນິກທີ່ທັນສະໄໝເຂົ້າ

ໃນການຜະລິດເພື່ອຍົກສູງສະມັດຕະພາບໃຫ້ສູງຂື້ນ, ຊຶ່ງປະຊາຊົນບ້ານດອນມະໄຫຼແມ່ນມີຄວາມດຸໝັ່ນຂະຫຍັ່ນພຽນບວກກັບຄວາມຕື່ນຕົວ ແລະ ມູນເຊື້ອປູກຝັງມາແຕ່ດົນນານຊຶ່ງພາຍຫຼັງທີ່ສຳເລັດລະດູການເກັບກ່ຽວເຂົ້ານາປີປະຊາຊົນ 152 ຄອບຄົວ ຊຶ່ງກວມເອົາ 100% ຂອງຄອບຄົວພາຍໃນບ້ານກໍ່ໄດ້ຫັນລົງສູ່ການຜະລິດປູກພືດຜັກລະດູແລ້ງຕາມເນື້ອທີ່ລຽບແຄມແມ່ນ້ຳຂອງສ່ວນໃຫຍ່ໂດຍອາໄສແມ່ນ້ຳຂອງເປັນຫຼັກໃນການຫົດເນື້ອທີ່ທຳການຜະລິດໃນເນື້ອທີ່ທັງໝົດ 58 ເຮັກຕາ ເຮັດໃຫ້ການຜະລິດເປັນສິນຄ້າຂອງບ້ານດອນມະໄຫຼແມ່ນມີຂະບວນການຟົດຟື້ນສາມາດສ້າງລາຍຮັບຈາກການປູກພືດຜັກໂດຍສະເລ່ຍປະມານ 35 ລ້ານກີບຕໍ່ຄອບຄົວຕໍ່ປີ.

 

ຄອບຄົວ ທ່ານນາງ ໂນລາ ຈັນທະວົງ ແມ່ນຄອບຄົວໜຶ່ງທີ່ພົ້ນເດັ່ນໃນການຜະລິດເປັນສິນຄ້າ ພາຍໃນຄອບຄົວມີສະມາຊິກທັງໝົດ 6 ຄົນ, ໃນນັ້ນແຮງງານຕົ້ນຕໍ 2 ເຊິ່ງມີເນື້ອທີ່ທຳການຜະລິດ 0,3 ເຮັກຕາໂດຍໃນເນື້ອທີ່ດັ່ງກ່າວແມ່ນໄດ້ແບ່ງປູກພືດຫຼາຍຊະນິດເຊັ່ນ: ປູກໝາກແຕງ, ໝາກເຂືອ, ໝາກເລັ່ນ, ໝາກຖົ່ວ ແລະ ພືດອື່ນໆ ສາມາດສ້າງລາຍຮັບໂດຍສະເລ່ຍປະມານ 50 ລ້ານກີບ ຕໍ່ປີຈາກລາຍຮັບດັ່ງກ່າວແມ່ນສາມາດສົ່ງລູກຮຽນຈົນຈົບວິຊາຊີບ ແລະ ໄດ້ເຂົ້າເຮັດວຽກເປັນພະນັກງານ-ລັດຖະກອນ, ມີເຮືອນຢູ່ຖາວອນ, ມີລົດ ແລະ ມີລາຍຮັບທີ່ໝັ້ນຄົງເຮັດໃຫ້ຊີວິດການເປັນຢູ່ດີຂື້ນທຽບກັບຄອບຄົວອື່ນ.

ສຳລັບການປູກຝັງຂອງພໍ່ແມ່ປະຊາຊົນບໍ່ສະເພາະແຕ່ບ້ານດອນມະໄຫຼ ເພາະມີອີກຫຼາຍໆ ບ້ານຂອງເມືອງທ່າແຂກຊຶ່ງທ່ານ ນາງ ບົວທອງ ສີສະຫຼຽວ ໜ່ວຍງານປູກຝັງຫ້ອງການກະສິກຳ ແລະ ປ່າໄມ້ເມືອງທ່າແຂກກ່າວວ່າ: ໃນລະດູແລ້ງປີນີ້ຂະບວນການປູກພືດເປັນສິນຄ້າ ແມ່ນມີການຂະຫຍາຍຕົວຫຼາຍ, ທາງດ້ານຂະແໜງການທີ່ກ່ຽວຂ້ອງ ໂດຍສະເພາະແມ່ນຫ້ອງການກະສິກຳ ແລະ ປ່າໄມ້ເມືອງແມ່ນໄດ້ລົງຊຸກຍູ້ຢ່າງເປັນປະຈຳ ແລະ ໄກ້ສິດຕິດແທດ, ມີການແນະນຳປັບປຸງພັດທະນາໂດຍເນັ້ນໃສ່ເຕັກນິກທີ່ທັນສະໄໝເພື່ອເຮັດໃຫ້ຜົນຜະລິດຂອງພໍ່ແມ່ປະຊາຊົນສູງຂື້ນ ຕອບສະໜອງໄດ້ຕາມຄວາມຕ້ອງການຂອງຕະຫຼາດ ແລະ ໃນໂອກາດດັ່ງກ່າວກໍ່ຂໍຮຽກຮ້ອງໃຫ້ສັງຄົມກໍ່ຄືຜູ້ບໍລິໂພກຫັນມາບໍລິໂພກພືດຜັກທີ່ສາມາດຜະລິດເອງຢູ່ພາຍໃນໃຫ້ຫຼາຍຂື້ນເພື່ອຫຼຸດຜ່ອນການນຳເຂົ້າສິນຄ້າຈາກຕ່າງປະເທດ ແລະ ເພື່ອສົ່ງເສີມການຜະລິດຢູ່ພາຍໃນໃຫ້ມີການຂະຫຍາຍຕົວດີຂື້ນ.

 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ